News from Hazro City, Chhachh Valley and District Attock, Updated from Hong Kong.
ضلع اٹک:منصوبہ سی پیک پیکج 4 اور 5 ہکلہ تا پنڈی گھیب کے محنت کشوں نے تنخواہ نہ ملنے پر احتجاجاً ایک ماہ سے ہڑتال کی ہوئی ہے
پاکستان میں تعمیر و ترقی کے سب سے بڑے منصوبہ سی پیک پیکج 4 اور 5 ہکلہ تا پنڈی گھیب اور پنڈی گھیب تا ڈیرہ اسماعیل خان پر کام کرنے والے 10 ہزار سے زائد ٹیکنیکل اور نان ٹیکنیکل محنت کشوں نے 5 ماہ سے تنخواہ نہ ملنے پر احتجاجاً گزشتہ ایک ماہ سے ہڑتال کی ہوئی ہے اور حکومتی سطح پر ایک کروڑ نوکریاں فراہم کرنے اور ’’ مدینہ کی طرز کی ریاست ‘‘ کی دعویدار حکومت کے کسی عہدیدار نے دنیا میں معاشی انقلاب برپا کرنے والے سی پیک روٹ کی بندش کے سلسلہ میں ان محنت کشوں کے مسائل سننے کی زحمت گوارہ نہیں کی ۔فتح جنگ پنڈی گھیب روڈ پر اسلام آباد سے محض 40 کلو میٹر دور سی پیک روٹ پر کام کرنے والی زیڈ کے بی اور ایم آر سی جنہوں نے اربوں روپے کی بھاری مشینری سے کام جاری رکھا ہوا تھا ‘نے بھی محنت کشوں کو تنخواہیں بند کر کے ان کے حال پر چھوڑ دیا ہے ۔محنت کشوں کے گھروں میں بھوک ، افلاس ، تنگ دستی اور فاقوں نے ڈیرے ڈال دیئے ہیں ۔ان محنت کشوں کو مسلسل 5 ماہ سے تنخواہیں نہ ملنے کے سبب ان محنت کشوں کے اہل خانہ جس کرب ، دکھ ، تکلیف ، مشکلات ، مصائب ، محلہ کے دکانداروں کی جھڑکیاں اور گھر کا سودا سلف پیسے نہ ملنے پر بند کر کے جس اذیت ناک صورتحال سے دوچار ہیں ‘انہیں دیکھ کر فتح جنگ پنڈی گھیب روڈ پر سی پیک روڈ پر کام کرنے والا محنت کش 2 مرتبہ مزدوروں کیلئے قائم کیے گئے کوارٹروں میں چھت سے لگے پنکھے اور اپنے گلے میں رسی ڈال کر خودکشی کی کوشش کر چکا ہے جسے دیگر مزدوروں نے بروقت نیچے اتار کر اسے تسلی ، تشفی اور اس کی دلجوئی کر کے اس کا حوصلہ بڑھاتے ہیں ۔محنت کشوں کی اکثریت امیروں کی بیماریوں ڈپریشن ، بلڈ پریشر ، شوگر اور دیگر مہلک امراض کا شکار ہو چکی ہے ،محنت کشوں کی اکثریت جو قبائلی علاقہ جات ، جنوبی پنجاب ، سندھ اور بلوچستان جیسے دور دراز علاقوں سے تعلق رکھتی ہے‘ 5 ماہ سے تنخواہیں نہ ملنے پر گھروں کو واپس جانے کا کرایہ بھی نہ ہونے کے سبب سی پیک روٹ کے کیمپوں میں بے یارو مددگار پڑی ہے ۔میڈیا سے بات چیت کرتے ہوئے ان محنت کشوں نے بتایا کہ جن کمپنیوں نے انہیں بھرتی کیا اور اب تنخواہوں سے محروم رکھا ہوا ہے ان کے مالکان اب ہمارے فون سننا بھی گوارا نہیں کرتے اس حوالہ سے میڈیا کے نمائندگان نے بھی ان مالکان سے رابطہ کرنے کی کوشش کی تاہم مالکان اور ان کے اسٹاف نے بہت کوشش کے باوجود فون اٹینڈ نہیں کیا وفاقی دارالحکومت جہاں صدر ، وزیر اعظم ، چیف جسٹس پاکستان ، وفاقی کابینہ ، سینٹ ، قومی اسمبلی اور دیگر طاقتور اداروں سے محض نصف گھنٹہ کی مسافت پر روزانہ کسی مسیحا کی آمد کے منتظر یہ محنت کش اور دور دراز علاقوں میں جانوروں سے بد تر زندگی بسر کرنے والے ان کے اہلخانہ جھولیاں اٹھا کر حکومت اور سی پیک کے ٹھیکیداروں کو بد دعائیں دے رہے ہیں کہ جن کے سبب مسلمانوں کے بڑے مذہبی تہوار عید قرباں پر یہ اور ان کے اہلخانہ خوشیوں سے محروم رہے اور محرم میں بھی جب دنیا بھر میں اہل بیت کے مظالم پر مجلس اعزا ، ماتمی جلوس ، شبیہہ ذوالجناح اور اہل بیت پر مظالم کے ذکر پر جب مسلمان آنسو بہاتے رہے ان لمحات میں بھی یہ محنت کش نہ تو عید کی خوشیوں میں شریک ہو سکے اور نہ ہی محرم کے ایام میں اہل بیت کی شان بیان کرنے پر آنسو بہا سکے کیونکہ گھروں میں بھوک ، افلاس ، فاقوں کے سبب ان کے شب و روز اور ایام ایک ہی طرح کے گزر رہے ہیں ۔
اٹک سٹی:اٹک پولیس نے اندھے قتل کا سراغ لگا لیا ،مقدمہ قتل کا مدعی اور مقتول کا سگا بیٹا قاتل نکلا
اٹک پولیس نے اندھے قتل کا سراغ لگا لیا ،مقدمہ قتل کا مدعی اور مقتول کا سگا بیٹا قاتل نکلا ۔اٹک پولیس نے جانفشانی سے تفتیش کر کے اصل قاتل گرفتار کر لیا ،تھانہ صدر اٹک پولیس اور آئی ٹی کا شعبہ شاباش کے مستحق ہیں جن کی کاوشوں سے قاتل گرفتار ہوا والد کو قتل کر نے سے چند روز قبل اپنے والد کا موٹر سائیکل بھی چوری کیا ۔ان خیالات کا اظہار ڈی ایس پی صدر سرکل اٹک ضیغم عباس نے پریس کانفرنس میں کیا ۔اس موقع پر ایس ایچ او تھانہ صدر اٹک سب انسپکٹر عاطف ستار ،ایس ایچ او سٹی ، انچارج ایچ آئی یو سرکل صدر اٹک آصف خان ، انچارج آئی ٹی لیب اٹک سب انسپکٹر جہانزیب خان بھی موجود تھے انہوں نے بتایا کہ ڈی پی او اٹک کے حکم پر ٹیم تشکیل دیکرتفتیش کی گئی اور جدید وسائل بروئے کار لاتے ہوئے شوکت محمود کو گرفتار کیا گیا جس نے دوران تفتیش بتایا کہ اُس نے پیسے کی لالچ میں والد کو قتل کیا ہے جبکہ قبل ازیں وہ اپنے والد کا ہنڈا 70موٹرسائیکل بھی چوری کر چکا ہے پولیس نے قاتل سے چوری شدہ موٹر سائیکل اور آ لہ قتل برآمد کر لیا ہے ۔
اٹک سٹی:ضلعی زرعی مشاورتی کمیٹی اٹک کا ایک اجلاس ڈپٹی کمشنر آفس میں منعقد ہوا
ضلعی زرعی مشاورتی کمیٹی اٹک کا ایک اجلاس ڈپٹی کمشنر آفس میں منعقد ہوا ۔ اجلاس کی صدارت ایڈیشنل ڈپٹی کمشنر (جنرل) اٹک طارق خان نیازی نے کی ۔ اجلاس میں ڈپٹی ڈائریکٹر زراعت (توسیع) اٹک اور تمام تحصیلوں کے اسسٹنٹ ڈائریکٹرز (توسیع) کے علاوہ دیگر متعلقہ افسران نے شرکت کی ۔اجلاس میں ضلع میں کسان پیکیج کے تحت جاری سکیموں کا جائزہ لیا گیااور ان پر عمل درآمد کی رفتار کو مزید بہتر بنانے کا فیصلہ کیا گیا ۔ اجلاس کو تمام تحصیلوں کے اسسٹنٹ ڈائریکٹرز (توسیع) نے اپنی اپنی تحصیلوں میں جاری کاموں پر بریفنگ دی اور ان کی موجودہ پوزیشن کے بارے میں بتایا گیا ۔ ایڈیشنل ڈپٹی کمشنر(جنرل) اٹک طارق خان نیازی نے تمام متعلقہ افسران کو ان سکیموں کی فوری تکمیل یقینی بنانے کی ہدایت کی ۔ انہوں نے کہا کہ حکومت کسانوں کی فلاح و بہبود کے لئے وافر مقدار میں فنڈز فراہم کررہی ہے اور کسانوں کی سہولت کے لئے انہیں مالی معاونت کے علاوہ ہر قسم کی فنی معاونت بھی فراہم کررہی ہے تاکہ کسانو ں کی معاشی حالت کو بہتر بنایا جاسکے اور ملک کو خوراک کے معاملے میں خود کفیل بنایا جاسکے ۔انہوں نے کہا کہ زراعت ہماری ملک کی معیشت کا سب سے اہم فیکٹر ہے اور اس کی ترقی سے ہی ملکی ترقی جڑی ہوئی ہے اس لئے ضروری ہے کہ ہم اس شعبہ سے وابستہ افراد کی حوصلہ افزائی کریں تاکہ ملک خوشحال ہو سکے ۔انہوں نے کہا کہ تمام فیلڈ افسران کسانوں کی شکایات کا فوری ازالہ کریں ۔انہو ں نے کہا کہ حکومت جس طرح آبپاش رقبے میں اضافہ کے لئے پانی کے وسائل کی فراہمی کے لئے اسی فیصد سبسڈی فراہم کررہی ہے اور ٹنل ٹیکنالوجی کے فروغ کے لئے بھی سبسڈی فراہم کی جارہی ہے فیلڈ سٹاف اور افسران کسانوں کو اس بارے مکمل آگاہی فراہم کرنے کے ساتھ ساتھ انہیں ہر طرح معاونت اور راہنمائی بھی فراہم کریں ۔
اٹک سٹی:سیاحت کے فروغ کیلئے حکومت کوانقلابی اقدامات کرنے ہوں گے؛طارق چھوغوری
سیاحت کے فروغ کیلئے حکومت کوانقلابی اقدامات کرنے ہوں گے ،11دسمبرکوپہاڑوں کے عالمی دن کے موقع پر حکومت کوانٹرنیشنل ٹورزم کانفرنس کاانعقادکرناچاہیے جس میں یورپ،ہانگ کانگ ،دبئی اوردیگرممالک کے ٹورآپریٹرزاور غیرملکی سفارت کاروں کوبھی دعوت دی جائے ،اس کے علاوہ دنیابھرمیں پھیلے ہوئے پاکستانی سفارت خانوں کوسیاحت کے فروغ کیلئے خصوصی ٹاسک دے کرفعال کیاجائے ،سیاحت دنیاکی دوسری بڑی اورسب سے زیادہ منافع بخش صنعت ہے ‘اس کے فروغ سے پاکستان کونہ صرف اربوں ڈالرکازرمبادلہ حاصل ہوگابلکہ ملک سے غربت اوربے روزگاری کاخاتمہ بھی کیاجاسکتاہے ۔ان خیالات کااظہارچھوغوری ٹورسٹ اینڈٹریکنگ کلب رجسٹرڈکے چیئرمین طارق چھوغوری نے صحافیوں سے خصوصی گفتگوکرتے ہوئے کیا،انہوں نے کہاکہ حکومت نے سیاحت کے فروغ کیلئے کئی اقدامات کاوعدہ کیاتھا لیکن عملی طورپرابھی تک کچھ نظرنہیں آیاحتی کہ عالمی یوم سیاحت کے موقع پربھی کوئی تقریب منعقد نہ ہوسکی ،اس موقع پرکراس روٹ کلب، نیشنل ٹورازم پاکستان،کے ٹوکنگز،رائیڈرزآف پاکستان ،ڈائیجیرین،گوجرانوالہ ٹریکرزاوردیگرسیاحتی تنظیموں نے محکمہ سیاحت آزادکشمیرکے اشتراک سے طولی پیرمیں ایک تقریب کاانعقاد کیاتھاجبکہ پہاڑوں کے عالمی دن کے موقع پرکہوٹہ کے قریب ایک بڑی تقریب منعقدکی جائے گی ۔
اٹک سٹی:سابق ملا زم جی پی او اٹک بابو محمد الیاس کے صاحبزادوں کی شادی خانہ آبادی بخیر وخوبی انجام پا گئی
سابق ملا زم جی پی او اٹک بابو محمد الیاس کے بیٹوں ،معروف کاروبا ر شخصیت حاجی رب نواز نیازی ، کنیڈا پلٹ تاجر خالد محمود کے تینوں بھانجوں ٹیچر محمد وقاص احمد ، پروپرائیٹر یونیک کمپوزنگ محمد ریحان اور محمد ارسلان کی شادی خانہ آبادی بخیر و خوبی انجام پائی ۔شادی کے موقع پر مقامی میرج ہال میں دعوت ولیمہ کا انعقاد ہوا جس میں سابق رکن قومی اسمبلی و رہنما تحریک انصاف محمد زین الٰہی ، کونسلر بلدیہ اٹک حاجی محمد اکرم خان ،چیئر مین اٹک پریس کلب رجسٹرڈ ندیم رضا خان، معروف صحافی حافظ عبدالحمید خان ، پرنسپل پی اے ایف کامرہ کینٹ حافظ خلیل الرحمن ، پروفیسر گورنمنٹ ڈگری کالج عاصم رشید ، ڈاکٹر ممریز خان، محکمہ جنگلات کے سپرنٹنڈنٹ میاں شیر افگن سمیت معززین شہر قریبی عزیزو اقارب اور دوست احباب نے شرکت کی اور شادی کے بندھن میں ایک ساتھ بندھے جانے پر تینوں بھائیوں اُن کے والد بابو محمد الیاس اور رشتہ داروں کو مبارک باد دی اور نیک خواہشات کا اظہار کیا ۔
حضرو شہر میں 2 نئے کمپیوٹر سنٹر اور عدالتوں کے قیام کا اعلان‘ سوئی گیس کے نئے دفتر کا بھی افتتاح کر دیا گیا
مشیر موسمیاتی تبدیلی ملک امین اسلم کا حضرو میں 2 نئے کمپیوٹر سنٹر اور عدالتوں کے قیام کا اعلان ، وزیر اعظم عمران خان پاکستان کو بہت جلد بحرانوں سے نکال لیں گے ،اٹک کی عوام کیلئے ایک دن مختص کیا جائے گا ۔نئے سوئی گیس کے دفتر کے قیام سے اہلیان حضرو کے دیرینہ مسائل حل ہو نگے ‘ہمیشہ شرافت کی سیاست کو فروغ دیا جبکہ سیاست کرنے کا مقصد حلقہ کی عوام کی خدمت کرنا ہے ۔منافقین در بدر کی ٹھوکریں کھا رہے ہیں ،ان خیالات کا اظہار انہوں نے حضرو میں سوئی گیس کے نئے دفتر کی افتتاحی تقریب کے بعد بلدیہ حضرو میں منعقدہ اجتماع عام سے خطاب کرتے ہوئے کیا جس کا اہتمام وائس چیئرمین یونین کونسل غورغشتی و سینئر رہنما تحریک انصاف حاجی مشتاق میر ، کوآرڈینٹراشفاق خان غورغشتی ، منا سرفراز ڈار،ملک ثمر عباس نمبردار، طارق ٹوانہ،ڈاکٹر جاوید خان نے کیا ، اسٹیج سیکرٹری کے فرائض معروف صحافی ڈاکٹر مسعود اختر نے سر انجام دیئے اس موقع پر چیئرمین بلدیہ حضرو نزاکت خان،سابق چیئرمین حاجی سعید آرائیں،ملک اعجاز،ملک سیف الرحمن،ڈاکٹر الطاف،قاری حسن،ملک عبد المناف،رانا شوکت علی خان،حاجی اورنگزیب،احسان خان،ملک اظہر حسین، خورشید آرائیں، ملک رفیق آرائیں،جہانزیب خان، وائس چیئرمین یونین کونسل خگوانی ملک آفتاب، افراز ملک، عامر عتیق، رہنما تحریک انصاف ، محکمہ سوئی گیس کے افسران ودیگر بھی موجود تھے ملک امین اسلم نے کہا کہ وزیر اعظم عمران خان کو ورثے میں ملنے والے بحران راتوں رات حل نہیں ہو سکتے 100 دن بعد ملک میں نمایاں تبدیلی آئے گی انہوں نے کہا کہ سعودی عرب کے کامیاب دورے کے بعد چین او رملائیشیا کا دورہ بھی کامیابی سے ہمکنار ہوگا کیونکہ عمران خان ایک ایماندار انسان ہیں ان پر پوری دنیا اعتماد کر تی ہے جب بھی اقتدار ملا اٹک کے عوام کی بہتری کیلئے اقدامات کیے حضرو میں سوئی گیس کے حصول کیلئے عوام کو شدید مشکلات کا سامنا کرنا پڑتا تھا اب ان کے مسائل یہیں پر حل ہونگے ایک کمپیوٹر سنٹر ہونے کی وجہ سے یہاں کے عوام کو شدید مشکلات کا سامنا ہے وزیر اعلیٰ پنجاب سے مزید 2کمپیوٹر سنٹر حضرو کیلئے منظور کروا لیے گئے ہیں جبکہ عدالتیں نہ ہونے کی وجہ سے حضرو بھر کی عوام کو روزانہ اٹک جانا پڑتا ہے بہت جلد حضرو میں بھی عدالتوں کا قیام عمل میں لایا جائے گا ہم نے ہمیشہ علاقہ میں شرافت کی سیاست کو فروغ دیا ہمارے خلاف سازشیں کرنے والے مخالفین آج در بدر کی ٹھوکریں کھا رہے ہیں اور آئندہ بھی کھاتے رہیں گے ہمیشہ حلقہ کی عوام کیلئے دروازے کھلے ہیں وزیر اعظم عمران خان نے جو ذمہ داری مجھے سونپی ہے اس پر پورا اترنے کی کوشش کر رہا ہوں اٹک کی عوام کیلئے اسلام آباد میں ایک دن مختص کیا جا رہا ہے جہاں صرف اٹک کی عوام کے مسائل حل کیے جائیں گے اس موقع پر اہلیان حضرو نے دیرینہ سہولیات کی فراہمی پر ملک امین اسلم کا شکریہ ادا کیا ۔
اٹک سٹی:محکمہ صحت ٹی ایچ کیو حضرو نے ڈیلی ویجز ملازمین کو نوکری سے فارغ کردیا ،ڈیلی ویجز ملازمین کا ڈی سی دفتر کے باہر احتجاج
محکمہ صحت ٹی ایچ کیو حضرو نے ڈیلی ویجز ملازمین کو نوکری سے فارغ کردیا ،ڈیلی ویجز ملازمین کا ڈی سی دفتر کے باہر احتجاج ‘تفصیلات کے مطابق حضرو وملحق دیہا ت کے رہائشیوں جمشید ، وقاص شیراز ، توقیر شہزاد ، اسد منیر، ثروت فاطمہ ، محمد عاصم عزیز ، محمد زوہیب قریشی، عامر خان ، عباس علی ، راشد محمود ، ثاقب علی، محمد صفدر ، عادل نسیم ، محمد افضال نے ڈی سی اٹک کو تحریری درخواست احتجاج کرتے ہو ئے کہا کہ تقریب 2 سال پہلے صوبہ پنجاب میں شعبۂ ہیلتھ میں قائم کردہ ہیلتھ کونسل کے فنڈ کے تحت ہزاروں ڈیلی ویجز ملازمین کو پنجاب کے تمام ٹی ایچ کیو اور ڈی ایچ کیو ہسپتالوں میں بھرتی کیا گیا جس کی وجہ سے ہزاروں غریب اور مجبور لوگوں کو روزگار کی سہولت میسر آگئی ،موجودہ گورنمنٹ کے قیام کے بعد ہیلتھ کونسل کو بجٹ کی فراہمی روک دی گئی اور اب پنجاب کے مختلف ٹی ایچ کیو اور ڈی ایچ کیو ہسپتالوں سے ان غریب اور مجبور لوگوں کو ملازمت سے فارغ کر نا شروع کر دیا جس کی وجہ سے ہزاروں غریب اور مجبور لوگوں کے گھروں کے چولہے ٹھنڈا ہونا شروع ہو گئے اسی سلسلہ میں تحصیل ہیڈکوارٹر ہسپتال حضرو میں 14 ڈیلی ویجز ملازمین کو فارغ کر دیا گیا ڈیلی ویجز ملازمین نے چیف جسٹس آف پاکستان ، وزیر اعظم پاکستان ، ہیلتھ منسٹر ، سیکرٹری ہیلتھ سے خصوصی داد رسی کی اپیل کی ہے ۔
اٹک شہرکے نواحی علاقہ بروٹھہ کالونی میں گیارہ سالہ بچی کرش پلانٹ میں گرنے سے جاں بحق
اٹک شہرکے نواحی علاقہ بروٹھہ کالونی میں گیارہ سالہ بچی کرش پلانٹ میں گرنے سے جاں بحق ، لاش ہسپتال منتقل ، تفصیلات کے مطابق 11 سالہ رباب غازی بروٹھہ کالونی میں کرش پلانٹ پر کھیل رہی تھی کہ اچانک پلانٹ کا ایک حصہ ٹوٹ کر گرا جس کے سبب رباب بجری کے منوں ڈھیر کے نیچے آ کر دب گئی ،اطلاع ملتے ہی ریسکیو 1122 کی ٹیم جائے وقوعہ پر پہنچ گئی جنہوں نے ہیوئی مشینری کے ذریعے بجری کے ڈھیر کو ہٹا کر بچی کو نکالا بجری کے ڈھیر کے نیچے آ کر دب جانے سے بچی کا سانس بحال نہ رہ سکا جس کے سبب وہ جان کی بازی ہار گئی۔ ریسکیو 1122 کے عملہ نے لاش کو تحصیل ہیڈ کوارٹر ہسپتال اٹک منتقل کر دیا گیا ،ریسکیو آپریشن میں فوجی چھاونی قریب ہونے کی وجہ سے پاک آرمی کے جوانوں نے بھی مدد کی ۔
گاؤ ں پائیندہ :سابق وفاقی وزیر شیخ آفتاب احمد نے تحصیل حضرو کے مختلف گاؤں میں دعوت ولیمہ شرکت کی
سابق وفاقی وزیر شیخ آفتاب احمد نے تحصیل حضرو کے مختلف گاؤں میں دعوت ولیمہ شرکت کی جہاں پر انہوں نے اقبال خان کے بیٹے اور پینداگاؤں میں ملک عمران کے کزن کی دعوت ولیمہ میں شرکت کی اور دونوں دولہوں کو مبارکباد پیش کی۔ اس موقع پر تقریب میں ایم پی اے جہانگیر خانزادہ ، ڈاکٹر اشرف بٹ ، طلال اشرف بٹ ، وائس چیئرمین ملک محمد نعیم ، ممبر ضلع کونسل ملک انصار احمد ، شیخ ساجد محمود ، ضلعی سیکرٹری اطلاعات میاں راشد مشتاق ، کونسلر علی اصغر ، لالہ فیض عالم ، شیخ حامد قدوس بھی موجود تھے ۔
اٹک سٹی:ضمنی الیکشن میں تحریک انصاف کو شکست پارٹی میں موجود منافقوں کی مرہون منت ہوئی ؛ ملک امین اسلم
امریکہ پلٹ معروف کاروباری شخصیت صوفی صابر کے گھر میڈیا نمائندگان سے گفتگو ، گرین پاکستان کے حوالہ سے مرزا گاوں میں پودا بھی لگایا ۔تفصیلات کے مطابق مشیر برائے موسمیاتی تبدیلی ملک امین اسلم نے میڈیا سے بات چیت کرتے ہوئے کہا کہ 50 دن میں 20 سال کا گند سمیٹنے کی کوشش کر رہے ہیں ،ضمنی الیکشن میں تحریک انصاف کو شکست پارٹی میں موجود منافقوں کی مرہون منت ہوئی ،وزیر اعظم عمران خان نے کشکول نہیں پکڑا بیرون ممالک جانے پر ڈالر خود قدموں میں گرئے وہ اپنی سٹیل ملز کے لیے نہیں ملکی مفاد کے لیے بیرون ممالک گئے نیپرا کی جانب سے بجلی بڑھانے کی 4 روپے والی سفارشات کو رد کرتے ہوئے ایک روپیہ سے زائد مہنگی کی گئی پوری کوشش ہے کہ آئی ایم ایف کے پاس نہ جانا پڑے کیونکہ ان کی شرائط انتہائی سخت ہیں اپوزیشن احتساب کے خوف سے اکٹھی ہو رہی ہے عدم اعتماد سے ڈرنے والا عمران خان نہیں ناجائز تجازوزات کی زد میں آنے والے ریڑھی بانوں کو متبادل جگہ دی جائے گی گرین پاکستان کے حوالہ سے مرزا گاؤں میں پودا بھی لگایا گیا اس موقع پر معززین علاقہ اور میڈیا نمائندگان کی کثیر تعداد موجود تھی ۔
ضلع اٹک:اسلحہ کی بھاری کھیپ کے پی کے سے پنجاب سمگل کرنے کی کوشش ناکام ، بھاری مقدار میں اسلحہ برآمد
اسلحہ کی بھاری کھیپ کے پی کے سے پنجاب سمگل کرنے کی کوشش ناکام ، بھاری مقدار میں اسلحہ برآمد ، ملزمان سے منشیات بھی برآمد ہوئی یہ بات ڈی پی او نے اپنے دفتر میں پریس کانفرنس سے خطاب کرتے ہوئے کہی ۔انہوں نے بتایا کہ ان کی ہدایت پر ڈی ایس پی حسن ابدال تنویر احمد ملک کی زیر نگرانی ، ایس ایچ او تھانہ صدر حسن ابدال سب انسپکٹر محمد فاروق نتھوکہ نے محرم کے چہلم کے سلسلہ میں جھاری کس چیک پوسٹ پر لگائی گئی اسپیشل پکٹ پر جہاں انچارج چوکی جھاری کس سب انسپکٹر عاطف ، اے ایس آئی کامران عزیز بمعہ پولیس ملازمین نے کے پی کے سے آنے والی مشکوک سلور رنگ کی گاڑی ہنڈا ری بون کو روکا تو اس میں 2 مشکوک افراد قوم پٹھان سکنہ مہمند ایجنسی و گاڑی کی تلاشی لینے پر گاڑی کے خفیہ خانوں سے بھاری مقدار میں ناجائز اسلحہ 10 کلاشنکوف معہ 20 میگزین ، 10 عدد 30 بور پسٹل معہ 20 میگزین ، 30 روند معہ 13400 گولیاں اور 550 گرام منشیات برآمد ہوئی جس پر ملزمان کو حسب ضابطہ گرفتار کر کے مقدمات درج کر لیے گئے ہیں ،ڈی پی او نے تمام افسران و ملازمین کو اس کاروائی پر شاباش دیتے ہوئے تعریفی اسناد اور نقد انعام کا اعلان کیا ہے ۔
اٹک شہر میں مقبوضہ کشمیر میں جاری بھارتی مظالم کے خلاف یوم سیاہ منایا گیا ،اس حوالے سے واک کا بھی اہتمام کیا گیا
اٹک شہر میں مقبوضہ کشمیر میں جاری بھارتی مظالم کے خلاف یوم سیاہ منایا گیا ،اس حوالے سے واک کا اہتمام کیا گیا جس کی قیادت ایڈیشنل ڈپٹی کمشنر (جنرل) اٹک طارق خان نیازی نے کی ۔اس موقع پر وائس چےئرمین ملک طاہر اعوان، ڈپٹی ڈائریکٹر لو کل گورنمنٹ جہانگیر مرزا،پرنسپل پائلٹ سکول شیخ آصف صدیقی، چیئرمین یونین کونسلز سید زاہد حسین بخاری ، ملک کامل حیات ، چوہدری عبدالسلام ، چیئرمین اٹک پریس کلب رجسٹرڈ ندیم رضا خان ، جوائنٹ سیکرٹری شیخ بابر قیوم ، سینئر صحافی جاوید کشمیری ، چیف آفیسر بلدیہ اٹک کے علاوہ دیگر سیاسی ، سماجی و مذہبی ارکان اور طلباء کی بڑی تعداد موجود تھی واک ضلع کونسل ہال سے شروع ہو کر لالہ زار سٹیڈیم اختتام پذیر ہوئی واک کے اختتام پر خطاب کرتے ہوئے ایڈیشنل ڈپٹی کمشنر (جنرل) اٹک طارق خان نیازی نے کہا کہ آزادی کشمیریوں کابنیادی حق ہے جو انہیں ہر صورت ملنا چائیے کشمیریوں کو آزادی نہ دے کر انکا بنیادی حق پا مال کیا جا رہا ہے جو انتہائی زیادتی ہے ضرورت اس امر کی ہے کہ اقوام عالم کشمیریوں کے ساتھ کھڑے ہوں اور بھارت کو مجبور کریں کہ وہ کشمیریوں کے حق خود ارادیت کا احترام کرے اور انہیں ان کی مرضی کے مطابق فیصلہ کرنے کا اختیار دے انہوں نے کہا کہ کشمیری عوام ڈوگرہ راج کے وقت سے آزادی کے لیےء کو شاں ہیں اور آج بھارت ان پر ظلم وستم ڈھا کر ان کی آواز کو دبانا چاہتا ہے جو ممکن نہیں ہے ظلم وستم کے ذریعے کشمیریوں کے حق خود ارادیت اور آزادی کی آواز کو نہیں دبایا جا سکتا انہوں نے کہا کہ پاکستان کی حکومت اور پاکستان کی عوام کشمیریوں کی اخلاقی اور سفارتی حمایت جاری رکھیں گے اب وقت آگیا ہے کہ کشمیر کا مسئلہ اقوام متحدہ کی قراردادوں اور کشمیری عوام کی امنگوں کے مطابق حل کیا جائے ،جس کا ان سے وعدہ کیا گیا ہے اور بھارت کو مجبور کیا جائے کہ وہ اپنی ریاستی دہشت گردی بند کرے اور کشمیری عوام کو اپنے مستقبل کا فیصلہ خود کرنے کا اختیار دے وہ دن دور نہیں جب کشمیری عوام کو بھارت کے ناجائز تسلط سے آزادی حاصل ہوگی اور وہ آزاد فضاء میں سانس لیں گے اور آزاد زندگی بسر کریں گے واک کے شرکاء نے اس مو قع پرکشمیریوں کے حق خود ارادیت کی بھر پو ر حمایت کا اعلان کیا واک میں شرکاء کی بڑی تعداد نے شرکت کی جنہوں نے ہا تھوں میں پلے کارڈز اور بینرز اٹھا رکھے تھے جن پر کشمیر کی آزادی کے نعرے درج تھے واک کے دوران شرکاء نے کشمیر کی آزادی کے حق میں نعرے لگائے اور کشمیریوں سے بھر پور یکجہتی کا اظہار کیا ۔
اٹک سٹی:ریسکیو 1122 اٹک کے عملہ کا ایک اور کارنامہ ، گہرے کنویں سے نوجوان کو بحفاظت نکال لیا
ریسکیو 1122 اٹک کے عملہ کا ایک اور کارنامہ ، گہرے کنویں سے نوجوان کو بحفاظت نکال لیا ، تفصیلات کے مطابق 17 سالہ نوجوان انعام اللہ ولد حاجی محمد سکنہ صدر کینٹ جو اپنے بے احتیاطی کے باعث گہرے کنویں میں جا گرا ‘اہل علاقہ نے فوراً ریسکیو 1122 کے عملہ کو کال کی اطلاع ملتے ہی ریسکیو 1122 کی ٹیم بروقت موقع پر پہنچ گئی جنہوں نے چند منٹوں میں نوجوان کو کنویں سے بحفاظت باہر نکال لیا بعد ازاں نوجوان کا طبی معائنہ کیا گیا ،معمولی چوٹ پر پٹی باندھ کر گھر بھیج دیا اہل علاقہ نے ریسکیو 1122 اٹک کی ان کاوشوں کو سراہتے ہوئے ان کا تہہ دل سے شکریہ ادا کیا ۔
اٹک سٹی: تجاوزات کے خلاف اٹک شہرکی 114 سالہ تاریخ میں سب سے بڑا آپریشن کا سلسلہ 15 روز سے مسلسل جاری ہے
ڈپٹی کمشنر اٹک عمران قریشی کے زیر نگرانی اسسٹنٹ کمشنر اٹک محمد عاطف نے تجاوزات کے خلاف اٹک شہرکی 114 سالہ تاریخ میں سب سے بڑا آپریشن کا سلسلہ 15 روز سے مسلسل جاری رکھا ہوا ہے ،ان کی نگرانی میں اٹک شہر کے تمام تجارتی مراکز میں نہ صرف سڑکات پر بلکہ گلیوں میں بھی تاجر اور شہری دن رات تجاوزات از خود ختم کر رہے ہیں جبکہ اے سی محمد عاطف کی نگرانی میں بھی سرکاری مشینری نے اب تک 15کروڑ روپے سے زائد کی سرکاری اراضی سے تجاوزات کا خاتمہ کر کے ریکارڈ قائم کیا ہے جس کو عوامی حلقے سرا رہے ہیں اور شہری پرُ امید ہیں کہ اے سی محمد عاطف گیڈر چوک جس میں تجاوزات تاجروں نے خود مسمار کرنا شروع کر دی ہیں ،جلد آپریشن شروع کریں گے تاکہ تجاوزات کے خلاف آپریشن کو حقیقی معنوں میں عملی جامہ پہنایا جا سکے ۔
اٹک سٹی: انسداد سموگ کے حوالے سے ضلع بھر میں اقدامات جاری ہیں؛رپورٹ
انسداد سموگ کے حوالے سے ضلع بھر میں اقدامات جاری ہیں اور اس ضمن میں تمام سرکاری ،نیم سرکاری اور نجی ادارے اپنا بھرپور کردار ادا کر رہے ہیں۔ان خیالات کا اظہار ایڈیشنل ڈپٹی کمشنر (جنرل) اٹک طارق خان نیازی نے ایک خصوصی نشست میں کیا۔ انہوں نے کہا انسداد سموگ کے حوالے سے خصوصی مہم چلائی جارہی ہے،جس میں تمام سٹیک ہولڈرز کو شامل کیا گیا ہے۔اس کے علاوہ عوامی آگاہی مہم بھی چلائی جارہی ہے جس میں عوام الناس کو سموگ کے حوالے سے آگاہی فراہم کی جارہی ہے۔اس ضمن میں عوام سے اپیل ہے کہ وہ ہر قسم کی آلودگی ،جس سے ماحول خراب ہونے کا اندیشہ ہو یا ماحول میں دھواں پھیلنے کا اندیشہ ہو ،اس سے سختی سے اجتناب کریں۔ماحول میں دھواں پھیلنے کی وجہ سے سموگ کا خطرہ بڑھ جاتا ہے اور اس سموگ سے کئی خطرناک بیماریاں جنم لیتی ہیں۔اس سلسلے میں ضرورت احتیاط کی ہے کہ دھواں چھوڑنے والی ہر شے بند کر دی جائے اورکھلی جگہ پر کوڑا کرکٹ نہ جلایا جائے۔انہوں نے کہا کہ اس ضمن میں محکمہ ٹریفک،لیبر،فاریسٹ اور ماحولیات نے اپنا کا م شروع کر دیا ہے،جو ہفتہ وار بنیادوں پر اپنی رپورٹ بھی متعلقہ حکام کو ارسال کر ہے ہیں۔ ایڈیشنل ڈپٹی کمشنر (جنرل) اٹک طارق خان نیازی نے ا نسداد سموگ کے سلسلے میں عوام سے اپیل کی کہ وہ سموگ کے مکمل خاتمے اور ماحول کو صاف اور خوشگوار رکھنے کے لیے ضلعی انتظامیہ کے ساتھ تعاون کریں۔
اٹک سٹی:زائد قیمت پر گوشت بیچنے والے قصابوں کے ساتھ کوئی رعایت نہیں برتی جائے گی ؛محمد عاطف (اسسٹنٹ کمشنر )
زائد قیمت پر گوشت بیچنے والے قصابوں کے ساتھ کوئی رعایت نہیں برتی جائے گی ،چھوٹے گوشت کا سرکاری ریٹ 600 روپے مقرر کیا گیا ہے ‘خلاف ورزی کرنے والوں کے خلاف قانونی کاروائی کی جائے گی ،کسی بھی قصاب کے خلاف کوئی شکایت ہو تو میرے آفس کے دروازے کھلے ہیں یا ان کے دفتر میں اطلاع دیں ‘اطلاع دینے والے کا نام صیغہ راز میں رکھا جائے گا ۔ان خیالات کا اظہار اے سی اٹک محمد عاطف نے میڈیا سے بات چیت کرتے ہوئے کیا ، اس موقع پر انہوں نے مزید کہا کہ کسی بھی ریڑی بان سے اگر کوئی تاجر ہفتہ وار یا ماہانہ رقم کا تقاضا کرے تو وہ برائے راست میرے ساتھ رابطہ کر سکتے ہیں ،اس کے خلاف بھی بلا تفریق و امتیاز کاروائی کی جائے گی ۔جرمانے کے ساتھ ساتھ ایف آئی آر بھی درج کی جائے گی ،عوام الناس کسی بھی اشیاء کی خریداری کے بعد مذکورہ تاجر ، ریڑی بان یا قصاب سے فروخت رسید ضرور طلب کریں یہ عوام کا بنیادی حق ہے ۔
کامل پور مائیاں :طاہر صادق کو نظر انداز کرنا اٹک کی عوام کو نظر انداز کے برابر ہے ‘طاہر صادق اٹک کی عوام کے لیڈر ہیں ؛ملک محمد نواز
میجر طاہر صادق کو نظر انداز کرنا اٹک کی عوام کو نظر انداز کے برابر ہے ‘میجر طاہر صادق اٹک کی عوام کے لیڈر ہیں ،وہ عوام کے دلوں میں بستے ہیں ۔پاکستانی قوم کو جس طرح عمران خان پر توقعات تھیں اسی طرح اٹک کی عوام کو میجر طاہر صادق پر توقعات تھیں ،قائد اٹک میجر طاہر صادق کو بائی پاس کر نے کی پالیسی پر عمل پیر ا ہو کر تحریک انصاف کو نا قابل تلافی نقصان ہو گا ان خیا لات کا اظہار رہنما میجر طاہر گروپ و معروف سیاسی و سماجی شخصیت ملک محمد نواز آف کامل پور مائیاں نے اٹک میں میڈیا سے غیر رسمی گفتگو میں کیا ۔ملک نواز نے کہا کہ ضلع اٹک کی غیور عوام میجر طاہر صادق سے والہانہ لگاؤ رکھتی ہے میجر طاہر صادق نے اپنے دورا قتدار میں ایسے کارنامے سر انجام دیے جس کی وجہ سے اٹک کی عوام اُن کو یادکرتی ہے انہوں نے عوام کی بے لوث خدمت کی ہزاروں بے روزگاری نوجوانوں کو روزگار فراہم کیا ضلع بھر میں ترقیاتی کاموں کے جال بچھائے دوردراز دیہاتوں کو بجلی فراہم کی اور سڑکیں بنائیں اُن کا دور اٹک کی تاریخ میں سنہری حروف سے لکھا جا چکا ہے میجر طاہر صادق مخلص عوام درد رکھنے والے لیڈر ہیں انہی کی وجہ سے اٹک کی عوام اپنا لیڈر مانتی ہے وہ جس جماعت میں ہوں وہ جماعت اٹک سے بھر پور جیتی ۔
اٹک سٹی:اٹک پولیس کی جانب سے پولیس لائن میں جنرل پریڈ کا اہتمام کیا گیا ، ڈی پی اواٹک نے پریڈ کا معائنہ کیا
اٹک پولیس کی جانب سے پولیس لائن میں جنرل پریڈ کا اہتمام کیا گیا ، ڈی پی اواٹک نے پریڈ کا معائنہ کیا ۔پولیس کے چاک و چوبند دستہ نے ڈی پی او کو سلامی دی ،پریڈ میں ضلع بھر سے ایس ڈی پی او اور ایس ایچ اوز نے شرکت کی پولیس لائن اٹک وسیع و عریض میدان میں سالانہ پریڈ کا اہتمام کیا گیا جس میں محکمہ پولیس ، ایلیٹ فورس ، ٹریفک پولیس اور لیڈیز پولیس کے دستوں نے ڈی پی او کو سلامی پیش کی ، مارچ پاسٹ کرنے والے دستوں کی پیشہ وارانہ مہارت پر ڈی پی او نے ان کی صلاحیتوں کو سراہا اس موقع پر دربار بھی لگایا گیا جس میں پولیس افسران اور ملازمان کی جانب سے مسائل پیش کئے گئے جس پر ڈی پی او نے موقع پر ہی مسائل حل کرنے کے احکامات جاری کئے ۔ڈی پی او نے دربار سے خطاب کرتے ہوئے کہا کہ پوری محنت اور لگن سے مخلوق خدا کی خدمت کو اپنا وطیرہ بنانا ہوگا کسی سائل کے ساتھ زیادتی ہر گز نہ کریں تاہم جرائم پیشہ افراد کو لگام دینا اور معاشرے کے ایسے ناسوروں سے نمٹناہمارا اولین فریضہ ہے لوگوں کی جان و مال کی حفاظت پولیس کی ذمہ داری ہے ٹھیک طریقہ تفتیش سے معاشرے میں پولیس کا وقار بڑھے گا آخرت کی جوابدہی کا احساس ہمارے اندر ہر وقت موجود ہونا چاہیے ۔
No comments:
Post a Comment