Weekly News from Attock City and Tehsil Hazro, (Punjab) Pakistan. Updated from Hazro (Attock).

Weekly News from Attock City and Tehsil Hazro, (Punjab) Pakistan. Updated from Hazro (Attock).

حضروسٹی: کو رٹ کے احکا ما ت کے با وجو د ٹریفک قوانین کی کھلے عام خلاف ورزیاں ‘بغیر لائسنس نو عمر رکشہ ڈرائیوروں نے انت مچا دی 

سپریم کو رٹ کے واضح احکا ما ت کے با وجو د حضرو میں ٹریفک قوانین کی کھلے عام خلاف ورزیاں ‘بغیر لائسنس نو عمر رکشہ ڈرائیوروں نے انت مچا رکھی ہے ،شہر میں ٹریفک کی بد ترین صورتحال ، رکشہ ڈرائیوروں کے من ما نے کرائے تفصیلا ت کے مطا بق سول سوسائٹی فورم کے اجلا س میں حضرو شہر کی بد ترین ٹریفک صورتحال پر شدید تشویش کا اظہار کیا گیا۔ اجلا س سول سوسائٹی فورم کے سرپرست اعلیٰ سمندر خان نمبردار کی زیر صدارت منعقد ہواجس میں منصبدار خان نمبر دار ، ندیم رضا خان ، حافظ نصرت علی خان ، محمد ارشد ، محمد نا صر ، سا جد ، حافظ صدیق ، اعجاز اکرم ، ریاست خان ، آصف محمود بھٹی کے علاوہ دیگرنے شر کت کی اجلا س میں شہر کی ٹریفک کی بد ترین صو رتحال پر اظہا ر خیال کیا گیا کہ عوام خوش تھے کہ رکشہ کے با رے میں سپریم کورٹ نے واضح احکا ما ت دئیے تھے لیکن افسوس کہ حضرو شہر میں صورتحال اس کے با لکل بر عکس ہے نو عمر نا با لغ رکشہ ڈرائیوروں نے شہر میں انت مچا رکھی ہے جس سے شہر کی ٹریفک کی صورتحال بد ترین ہے ہر طرف ٹریفک جام ہو تی ہے سو نے پر سہا گہ رکشہ ڈرائیوروں کے من مانے کرا ئے وصول کرنا شروع کر دیئے انتظا میہ سے گذارش ہے کہ رو ٹ اور فا صلے کے حسا ب سے کرایہ نا مہ مقرر کر ے یہی صو رتحال لوڈنگ رکشوں کی بھی ہے عوام اس صورتحال سے شدید پریشان ہیں کسی بھی سطح پر عوام کی کو ئی نہیں سنتا سول سوسائٹی فورم نے اعلیٰ حکام سے اپیل کی ہے کہ اس صو رتحال پر ایکشن لیا جا ئے اور روٹ کے مطا بق فی سواری کرایہ یاا سپیشل بکنگ کیلئے فی کلو میٹر کے حساب سے کرایہ مقرر کیا جائے تاکہ عوام ما لی استحصال سے محفوظ ہوسکیں عوا م کے حقوق کی حفاظت کر نا انتظا میہ کا کام ہے ٹریفک پو لیس کے ذریعے کرایہ نا مہ رکشوں میں نما یا ں جگہ آویزاں کیا جائے اور ڈرائیوروں کو پا بند کیا جائے کہ وہ ان کرایہ نامہ پر عمل کریں ۔ 

حضروسٹی:سابق صوبائی وزیر جہانگیر خانزادہ کی طرف سے چھچھ کے کسانوں کے ساتھ سنگین مذاق ،فصلوں کے لیے امداد منظور نہ کرائی جا سکی 

سابق صوبائی وزیر جہانگیر خانزادہ کی طرف سے چھچھ کے کسانوں کے ساتھ سنگین مذاق ، بارش اور برفباری سے تباہ فصلوں کے نقصان کا ازالہ کرنے کیلئے امداد منظور نہ کرائی جا سکی ، فنڈز نہیں دینا تھے تو چھچھ بھر کے کسانوں کو مساجد میں اعلانات کرکے بلدیہ میں کس مقصد کیلئے جمع کیا گیا ، جہانگیر خانزادہ سے الیکشن میں اس کا بدلہ لیں گے ، فصلوں کے نقصانات سے کچھ کسانوں کے پاس رمضان شریف میں گھر کا راشن تک نہیں جبکہ کچھ اپنے بچوں کی عید کے کپڑے اور جوتے نہ ہونے پر پریشان ہیں متاثرین کی صحافیوں سے گفتگو ، تفصیلات کے مطابق اپریل میں ہونے والی شدید طوفانی بارش اور ژالہ باری ( اولوں ) سے تحصیل حضرو میں کاشت فصلیں تباہ ہوگئی تھیں جن میں سبزی جات ، تمباکو ، گندم اور دیگر فصلیں سرفہرست تھیں جس پر کسانوں کی کمر ٹوٹ گئی اس مقصد کیلئے چھچھ بھر سے کسانوں کی مدد کیلئے صوبائی وزیر جہانگیر خانزادہ سے مطالبہ کیا گیا جس پر انہوں نے چھچھ بھر کی مساجد میں اعلانات کروا کے متاثرہ کسانوں کو بلدیہ حضرو میں جمع ہونے کا کہا اور اپنے گروپ کے سینئر و تجربہ کار رہنما احسن خان ، ضلعی کسان کونسلر وپی ایس ملک انصار ، مسلم لیگ(ن) سے تعلق رکھنے والے دیگر اپنے بااعتماد ساتھیوں اور پٹواریوں کے ذریعے تمام کسانوں کے نقصان کا سروے کیا گیا جس مقصد کیلئے کمیٹی سربراہ احسن خان نے جہانگیر خانزادہ کو 16 کروڑ روپے کا تخمینہ لگا کر بھیجا کہ حکومت پنجاب سے یہ رقم منظور کروا کر کسانوں میں تقسیم کروائی جائے تاہم جہانگیر خانزادہ اپنے وعدے اور اعلان کے باوجود کسانوں کو ریلیف دلانے کیلئے کسی قسم کے فنڈز کی منظوری نہ لے سکے جس پر کسانوں میں سخت اضطراب پایا جاتا ہے ، فصلوں کے نقصانات سے کچھ کسانوں کے پاس رمضان شریف میں گھر کا راشن تک نہ ہونے کی اطلاعات موصول ہوئی ہیں جبکہ کچھ اپنے بچوں کی عید کے کپڑے اور جوتے نہ ہونے پر پریشان ہیں متاثرین نے صحافیوں سے گفتگو میں کہا کہ اگر جہانگیر خانزادہ نے حکومت سے امداد نہیں دلانا تھی تو ہمیں کمیٹی بلا کر ہمارا تماشا کیوں بنایا گیا اور ہماری دیہاڑیاں کیوں ضائع کی گئیں ان کا کہنا تھا کہ اب الیکشن قریب ہیں ہم جہانگیر خانزادہ کو ووٹ نہ دے کر ان سے بدلہ لیں گے کیونکہ اگر وہ چاہتے تو حکومت کسانوں کو ضرور فنڈز دیتی اس حوالہ سے احسن خان اور ملک انصار سے رابطہ کیا گیا تو انہوں نے بھی فنڈز منظور نہ ہونے کی تصدیق کی اور کہا کہ جلد منظوری ہو جائے گی مگراب تو ان کی حکومت بھی ختم ہو گئی ہے محمد شہباز شریف نے کسی قسم کی منظوری نہیں دی ہے ۔ 

اٹک سٹی :نومبر میں ہونیوالا میجر گروپ کا جلسہ اور عوام کا ٹھاٹھیں مارتا سمندر عمران خان اپنی آنکھوں سے دیکھ چکے ہیں؛ اراکین میجر گروپ 

6نومبر 2017کو ضلع اٹک میں ہونے والا میجر گروپ کا جلسہ اور اس جلسہ گاہ کے اندر اورباہر عوام کا ٹھاٹھیں مارتا سمندر چیئرمین تحریک انصاف عمران خان اپنی آنکھوں سے دیکھ چکے ہیں جبکہ اٹک میں چند روز بیشتر مسلم لیگ ( ن ) کا ناکام ترین جلسہ اس بات کا عکاس ہے کہ اٹک میں اب عوام کسی اور سیاسی کو ماننے کو تیا ر نہیں ہم پی ٹی آئی کی اعلیٰ ترین قیادت کو واشگاف الفاظ میں یہ بتا دینا چاہتے ہیں کہ اس حلقہ میں زمینی حقائق و عوامی منشاء صرف میجر طاہر صادق کو پی ٹی آئی کے ٹکٹ پر الیکشن لڑتے دیکھنا چاہتے ہیں اور پارٹی کی کامیابی بھی صر ف اسی صورت میں ممکن ہے بصورت دیگراین اے 55پر مسلم لیگ ( ن ) کی جیت کی تمام تر ذمہ داری غلط فیصلوں کے باعث ہی ہوگی اور پارٹی کارکنان نہایت مایوسی کا شکار ہونگے جس کا شاخسانہ غیر متوقع الیکشن رزلٹ کی صورت میں نکلے گا ۔ان خیالات کا اظہارامیدوار پنجاب اسمبلی و ممبر ضلع کونسل اٹک ملک حمید اکبر خان ،امیدوار پنجاب اسمبلی حاجی محمد اکرم خان، کونسلران بلدیہ اٹک شیخ نثار احمد،رانا افسر علی، سجاد سرور، لیڈی کونسلروصدروومن وینگ تحریک انصاف ضلع اٹک امینہ نشاط جعفری ، چیئرمین یونین کونسل گولڑہ ملک عزیز الرحمن، وائس چیئرمین قاضی غلام مرتضیٰ،چیئرمین یونین کونسل مرزا سید جمشید افتخار شاہ،وائس چیئرمین ملک فیاست خان، چیئرمین یونین کونسل بو لیا نوال ملک منور خان، وائس چیئرمین محمد صالح،چیئرمین یونین کونسل اکھوڑی سردار امجد خان، وائس چیئرمین ملک محمد اکرم خان،چیئرمین یونین کونسل شیں باغ ملک شمیم خان، وائس چیئرمین ملک محمد سعید اکبر خان ، چیئر مین یونین کونسل سرگ سالار سردار وسیم امتیازایڈووکیٹ اور اٹک کی دیگر سرکردہ شخصیات جن میں سردار ہمایوں اکبر خان ڈھوک شرفا، زاہد خان اکھوڑی،سردار شبیر خان سرگ سالار، ڈاکٹر ممتاز خان مرزا، حاجی لال خان بولیا نوال، ملک لیاقت گولڑہ، مبارک شاہ کامرہ، منظور علی اور نیاز خان حاجی شاہ نے ایک اہم میٹینگ میں کیا انہوں نے کہا کہ 2013 ء کے عام انتخابات میں آزاد حیثیت میں 52000سے زائد ووٹ لینا ہی میجر طاہر صادق کا میرٹ ہے ایک ایسا شخص جسے مئی 2013کے بعد اب اس وقت ضلع اٹک کی حدود میں تب دیکھاگیا جب الیکشن ہونے جارہے ہیں کس بنیاد اور کس اہلیت پر این اے 55کا اہل امیدوار ہو سکتا ہے میجر طاہر صادق نے تحصیل اٹک کی 10میں سے 7یونین کونسلوں اور مسلم لیگ ( ن ) کی مرکز اور صوبہ میں بااختیار حکومتوں کے زیر سایہ ہونے والے بلدیاتی انتخابات میں جیت کر یہ ثابت کر دیا ہے کہ اصل عوامی طاقت و تائید کس کے پاس ہے ۔ 

حضروسٹی:رمضان المبارک کے مقدس ماہ میں غیر اعلانیہ بد ترین لوڈشیڈنگ نے عوام کا بھرکس نکال دیا، عوام بے بس ہو کر رہ گئی

رمضان المبارک کے مقدس ماہ میں غیر اعلانیہ بد ترین لوڈشیڈنگ نے عوام کا بھرکس نکال دیا، غیر اعلانیہ لوڈشیڈنگ سے عوام کا جینا محال ، سخت گرمی اور لوڈشیڈنگ کی وجہ سے مسجدوں میں پانی نایاب اور مچھروں نے نمازیوں کا نماز تراویح پڑھنے میں شدید مشکلات،آبادی میں اضافے کی وجہ سے پرانے بجلی کے ٹرانسفارمر مختلف علاقوں اور محلوں کا لوڈ برداشت نہیں کر سکتے ہیں جس کی وجہ سے لوڈ پڑنے پر ٹرانسفارمر ٹرپ کر جاتے ہیں اور 2,2گھنٹو ں تک ٹرنسفارمر ٹھنڈے ہونے پر دوبارہ آن کیے جاتے ہیں ،عوامی و سماجی حلقوں نے آبادی کے مطابق نئے پاور فل ٹرانسفارمر لگانے کا مطالبہ بھی کر رکھا ہے ،تفصیلات کے مطابق معصوم بچوں اور گھریلو خواتین کا برا حال،بجلی نہ ہونے کی وجہ سے مریض ہسپتالوں میں اور بجلی سے کام کرنے والے عید الفطر کی آمد کے موقع پر ٹیلرز اور دیگر دوکاندار ہاتھوں پہ ہاتھ دھرے پریشان،مسلم لیگ (ن) کی حکومت کے5سال پورے ہونے کے بعد نگران حکومت نے عوام سے بجلی کی غیر اعلانیہ لوڈشیڈنگ کر کے مسلم لیگ(ن) کی حکومت کے5سالہ دور میں بجلی مہیا کرنے کا ادھار چکانا شروع کر رکھا ہے ،دن ہو یا رات مسلسل چار چار گھنٹے بجلی بند رکھنا رمضان المبارک کے مقد س ماہ میں روزہ داروں کیلئے کسی عذاب سے کم نہ ہے اس غیر اعلانیہ لوڈشیڈنگ سے عوام کا جینا محال ہو گیا ہے اور سخت گرمی میں بجلی کے نہ ہونے کی وجہ مساجد میں جانے والے نمازیوں کا برا حال ہے جبکہ عید الفطر کی آمد کے موقع پر ٹیلرز اور دیگر کاروباری بجلی بند ہونے کی وجہ سے شدید پریشان اسی طرح ہسپتالوں میں غیر اعلانیہ لوڈشیدنگ کی وجہ سے مریضوں کا دم گھٹنے لگا علاوہ ازیں بد ترین لوڈشیڈنگ کے ساتھ بجلی کی آنکھ مچولی سے گھریلو الیکٹرونکس کی اشیاء خراب ہونے لگیں جس کی وجہ سے گھریلو ں خواتین کو بھی سخت پریشانی کا سامنا ،بجلی کی بندش سے سرکاری و نجی دفتروں میں کام ٹھپ،عوامی و سماجی حلقوں نے نگران وزیراعظم پاکستان جسٹس (ر) ناصر الملک،ڈپٹی کمشنر اٹک کیپٹن (ر) اکرام الحق اور محکمہ بجلی کے ذمہ داروں سے مطالبہ کیاہے کہ اٹک کی عوام پر رمضان المبارک کے مقد ماہ میں رحم کرتے ہوئے غیر اعلانیہ لوڈشیڈنگ کو فی الفور ختم کیا جائے۔ 

اٹک شہر میں غیر قانونی ٹرانسپورٹ اڈوں کی بھر مار، شہر میں ٹریفک اور پارکنگ کے مسائل حل کرنے میں ٹریفک پولیس کا عملہ بے بس ہوگیا

اٹک شہر میں غیر قانونی ٹرانسپورٹ اڈوں کی بھر مار، شہر میں ٹریفک اور پارکنگ کے مسائل حل کرنے میں ٹریفک پولیس کا عملہ ٹریفک کی روانی اور پارکنگ کیلئے بہتر اقدامات کرے، تفصیلات کے مطابق اٹک شہر میں ٹریفک کے رش ، سڑکوں پر گاڑیوں کی لمبی لائنوں کی وجہ سے شہر کی تمام سڑکیں بند رہنا معمول بن گیا، جگہ جگہ گاڑیوں اور رکشہ کی غلط پارکنگ کے باعث پیدل چلنے والے لوگ بھی شدید پریشان، کم سن بچے جن کا ابھی شناختی کارڈ بھی نہیں بنا وہ بھی کھلے عام رکشے ، موٹر سائیکل اور گاڑیاں چلا رہے ہیں ، اٹک اور گردونواح میں بغیر کاغذات ، بغیر نمبر پلیٹ ، اوورلوڈنگ ، اوورسپیڈ ، زائد کرایہ وصولی ، اور بغیر نمونہ نمبر پلیٹس موٹر سائیکل ، رکشوں اور گاڑیوں کی بھرمارٹریفک پولیس اس سلسلے میں بلاتفریق کاروائی کرکے اہل علاقہ کو درپیش مسائل و مشکلات سے نجات دلوائے، اٹک کے عوامی ، سماجی ، کاروباری حلقوں نے سی پی او ٹریفک پولیس ، ایس ایس پی ٹریفک پولیس راولپنڈی رینج ، ڈی پی او اٹک ، و دیگر اعلیٰ ارباب اختیار سے پرزور مطالبہ کیا ہے کہ شہر میں ٹریفک کے حوالے سے یہاں کے عوام کو جو مسائل ہیں ان کو فوری طور پر حل کیا جائے۔

تحصیل حضرو کی تین یو نین کو نسلو ں اور کنٹونمنٹ بورڈ کا مرہ کے درمیان جاری حدود تنازعہ تا حال حل نہ ہو سکا 

تحصیل حضرو کی تین یو نین کو نسلو ں (یونین کو نسل شمس آباد ، یو نین کو نسل تاجک ، یو نین کو نسل بہادرخان )اور کنٹونمنٹ بورڈ کا مرہ کے درمیان جاری حدود تنازعہ تا حال حل نہ ہو سکا ۔اہلیان یو سیز کے نمائندوں کا ایک اجلاس ڈاکٹر الطا ف قریشی کے ڈیرے پر گاؤں صاحبہ کمالہ میں منعقد ہو ا۔ڈاکٹر الطاف قریشی ، امجد بیگ نمبر دار، سید ریاض شاہ نے چند روز قبل ڈی سی اٹک کی سربراہی میں بلائے گئے اجلاس بارے اہلیان علاقہ کو آگاہ کیاجو بے نتیجہ اور معززین علا قہ کے بائیکاٹ پر ختم ہوا تھا اہلیان علاقہ کے اس اجلاس میں کہا گیا ہے کینٹ بورڈکا مرہ کی حدود جی ٹی روڈ کے ایک اطرف ہے دوسری طرف سول آبادی والی سائیڈ کو ہم کنٹونمنٹ بورڈ کی حد نہیں مانتے جدوجہد کا وقت آگیا ہے ہمارے 13گاؤں ہیں اگر اسی طرح ہم متحد رہے تو کوئی کچھ نہیں کر سکتا ہمارا سیاسی ، مذہبی ، لسانی یا کوئی اور مسئلہ نہیں ہمارا صرف ایک مقصد ہے کہ ہم جی ٹی روڈ سے سول آبادی والی سائیڈ پر کنٹونمنٹ بورڈ کو نہیں مانتے اجلاس میں متفقہ طور پر فیصلہ کیا گیا کہ احتجاجا ایک فطاری جی ٹی روڈ کا مرہ قطبہ چوک پر کی جائے گی جس میں اہلیان علاقہ کثیر تعداد میں شرکت کریں گے اس موقع پر قرآن خوانی بھی ہو گی اور یہ احتجاج پر امن ہو گا یہ ماہ رمضان کے کس دن ہو گا اس کا ایک دو روز میں باقاعدہ اعلان بھی کر دیا جائے گااجلاس میں جنرل کو نسلر انیس خان آف باسیہ ، حا فظ سعید احمد، ذاکر بیگ ، ملک رب نواز ، وائس چیر مین ملک نعیم ، مسلم نمبر دار ، رستم نمبردار ،حافظ عابد ، شیخ محمد فاروق، وقار احمد خان ، ندیم اعوان،ملک میر افضل ،کامران سلطان سمیت دیگر اہلیان علاقہ نے کثیر تعداد میں شرکت کی اجلاس کے بعد ڈاکڑ الطاف قریشی کی جانب سے پر تکلف افطار پارٹی بھی دی گئی ۔ 

اٹک سٹی: عام انتخابات میں ضلع اٹک سے قومی اسمبلی کی 2 اور پنجاب اسمبلی کی 5 نشستوں پر کاغذات نامزدگی جمع کرانے کا سلسلہ جاری 

عام انتخابات میں ضلع اٹک سے قومی اسمبلی کی 2 اور پنجاب اسمبلی کی 5 نشستوں پر کاغذات نامزدگی جمع کرانے کا سلسلہ جاری ،ڈسٹرکٹ ریٹرننگ آفیسر / ڈسٹرکٹ اینڈ سیشن جج سہیل اکرام نے ضلع اٹک میں عام انتخابات کو غیر جانبدارانہ ، منصفانہ اور شفاف بنانے کیلئے ہدایات جاری کر دی ہیں اور ان کی زیر نگرانی قومی و صوبائی اسمبلی کے 7 حلقوں میں الیکشن کمیشن کی ہدایات کی روشنی میں کاغذات نامزدگی حاصل کرنے اور جمع کرانے کا سلسلہ جاری ہے ۔حلقہ این اے 55 میں ریٹرننگ آفیسر / ایڈیشنل سیشن جج اشفاق احمد رانا کی عدالت میں تحریک انصاف کے ملک امین اسلم ، ان کے دست راست تیمور اسلم ، آزاد امیدواران سراج گل حسن ابدال ، آصف اقبال پنڈ تریڑ اور ڈاکٹر محمد نعیم حضرو نے کاغذات نامزدگی جمع کرائے ،اس حلقہ میں کاغذات جمع کرانے والوں کی تعداد 9 ہو گئی ہے ، اسی طرح حلقہ این اے 55 جو تحصیل فتح جنگ پنڈی گھیب اور جنڈ پر مشتمل ہے کے ریٹرننگ آفیسر / ایڈیشنل سیشن جج راجہ شاہد ضمیر کے پاس ملک فیصل یار خان آف کھنڈہ نے کاغذات نامزدگی جمع کرائے ، حلقہ پی پی 1 کے ریٹرننگ آفیسر / سینئر سول جج ایڈمن شفقت شہباز راجہ کے پاس ایم ایم اے محمد اقبال ملک نے کاغذات جمع کرائے اس حلقہ میں کاغذات نامزدگی جمع کرانے والوں کی تعداد 3 ہو گئی ہے ، حلقہ پی پی 2 کے ریٹرننگ آفیسر / سینئر سول جج ایڈمن عمر رشید کے پاس تحریک انصاف کے قاضی احمد اکبر اور آزاد امیدواران لیاقت محمود اور شوکت حیات نے کاغذات نامزدگی جمع کرائے ہیں اس حلقہ میں کاغذات نامزدگی جمع کرانے والوں کی تعداد 5 ہو گئی ہے ، حلقہ پی پی 3 کے ریٹرننگ آفیسر / سینئر سول جج ملک شاہد حسین اعوان جن کی معاونت اے آر او خرم شہزاد کر رہے ہیں کے پاس تحریک انصاف کے سابق ایم پی اے سردار محمد علی خان آف شاہراہ سعداللہ اور محمد ارشد حسن ابدال نے کاغذات نامزدگی جمع کرائے ، حلقہ پی پی 4 کے ریٹرننگ آفیسر / سول جج پنڈی گھیب طلال ارشد کی عدالت میں آزاد امیدوار ملک امانت خان راول اور ان کے کورنگ ملک نور محمد خان راول سنی تحریک کے زبیر احمد نے کاغذات نامزدگی جمع کرائے ، حلقہ پی پی 5 کے ریٹرننگ آفیسر / سول جج سیف اللہ تارڑ کے پاس سردار افتخار خان ، ملک نوید حسین ، سید احسن محمود ، سید عاطف حسین شاہ ، سردار شاہنواز خان ، ملک شہریار خان ، سابق ایم اپی اے ملک ظفر اقبال گلیال ، ملک ہارون رمضان ، داؤد عالم اور وائس چیئرمین ضلع کونسل ملک جمشید الطاف نے کاغذات نامزدگی جمع کرائے ۔ 

اٹک میں قومی اسمبلی کی اورپنجاب اسمبلی کی پانچ نشستوں کیلئے کاغذات نامزدگی حاصل اور جمع کرنے کا سلسلہ جاری، امیدواروں نے اپنے ساتھیوں سمیت کاغذات نامزدگی جمع کراکر جمہوری عمل کے تسلسل کو بر قرار رکھا ،تفصیلات کے مطابق ملک بھر کی طرح اٹک میں الیکشن 2018کی تیاریاں عروج پر پہنچ گئیں ، مختلف پارٹیوں کے امیدواروں نے پہلے روز حلقہ این اے 55اٹک ون پر کاغذات نامزدگی جمع کرادئیے، آج پہلے روز کاغذات جمع کرانے والو ں میں سابق وفاقی وزیر مسلم لیگ (ن )شیخ آفتاب احمد ، پیپلز پارٹی کی جانب سے دو حلقوں این اے 55اور56پر الیکشن لڑنے والے سلیم حیدر اور ذوالفقار حیات کیمونسٹ پارٹی کے انجینئر جمیل احمد ملک کے شامل تھے ، امیدوار اپنے کارکنا ن کے ہمراہ ایڈیشنل اینڈ سیشن جج رینٹرننگ آفیسر اشفاق احمد رانا کی عدالت پہنچے جہاں کاغذات نامزدگی جمع کرائے گئے ، این اے 55اٹک ون سے 18امیدواران نے کاغذات نامزدگی حاصل کیے دیگر کا غذات نامزدگی حاصل کرنے والوں میں سا بق ضلع ناظم نے چارکاغذات ، ان کے بیٹے سابق ایم این اے محمد زین الہی نے چار کاغذات ، سابق وفاقی وزیر نامزد امیدوار مسلم لیگ (ن ) شیخ آفتاب احمد نے چار کاغذات،محمد نعیم حضرو نے تین کاغذات جبکہ دو دو کاغذات حاصل کرنے والوں میں ملک امین اسلم ، شیخ محمد عارف، انجینئر جمیل احمد ملک ، صاحبزادہ حافظ سعید احمد دریا شریف ، ملک امیر افضل غورغشتی ، تیمور اسلم شامل ہیں جبکہ دیگر کاغذات حاصل کرنے 

والوں میں عوامی تحریک کے عبد الجبار دانش ، تحریک لبیک کے محمد حفیظ اللہ خان علوی ، سراج گل منو نگر حسن ابدال ، سکھ امیدوار راوندر سنگھ جگی ولد سردار بلبیر سنگھ جگی ساکن پنڈی گھیب حال محلہ سخی نگر حسن ابدال ،آصف اقبال ساکن پنڈ تریڑ شامل ہیں جبکہ ریٹرنگ آفیسر حلقہ پی پی 1سینئر سول جج ایڈمن شفقت شہباز راجہ کے پاس دو امیدواروں ڈاکٹر ضیاء الرحمن نورانی اور پی پی کے سردار عرفان جعفری نے کاغذات نامزدگی جمع کرائے اسی طرح ریٹرنگ آفیسر حلقہ پی پی 2 سینئر سول جج ایڈمن عمر رشید کے پاس بھی سابق وزیر کھیل پنجاب نامزد امیدوار مسلم لیگ (ن) جہانگیر خانزادہ اور پی پی پی کے احمد خانزادہ نے کاغذات نامزدگی جمع کرائے دونوں امیدوار آپس میں کزن اور ایک ہی حویلی میں مختلف رہائش گاہوں میں رہائش پذیر ہیں ان کی معاونت اے آر او خرم شہزاد نے کی ریٹرنگ آفیسر حلقہ پی پی 3 ملک شاہد حسین اعوان کے پاس کاغذات نامزدگی جمع کرانے والوں میں تحریک لبیک کے سردار راحت علی خان ،جسٹس اینڈ ڈیموکریٹک پارٹی کے عمران علی خان ،پی پی پی کے ریاض خان بالڑہ ، ذوالفقار حیات ایڈووکیٹ اور ناصر خان بنگو نے کاغذات جمع کرائے اسی طرح حلقہ پی پی 4سے مسلم لیگ (ن) کے سابق وزیر معدنیات چودھری شیر علی خان مہناس ، ان کے کورنگ سابق ایم پی اے ملک محمد اعظم خان گھیبہ جو ان کے 

برادری نسبتی بھی ہیں اس طرح تحریک انصاف کے سابق وزیر امداد باہمی کرنل ملک محمد انور خان اور ان کے کورنگ شیر علی اعوان نے بھی کاغذات نامزدگی جمع کرائے جبکہ حلقہ پی پی 5 کے عملے کے عدم تعاون کی وجہ سے وہاں سے کوئی معلومات نہ مل سکیں حلقہ این اے 56سے مسلم لیگ (ن) کے سابق ایم این اے ملک اعتبار خان ، پی پی پی کے سلیم حیدر ، تحریک لبیک کے پیر فیصل محمود گیلانی ،پاکستان جسٹس اینڈ ڈیموکریٹک پارٹی کے محرم خان ایڈووکیٹ نے کاغذات نامزدگی جمع کرائے جبکہ دیگر کاغذات نامزدگی حاصل کرنے والوں میں سابق ضلع ناظم میجر طاہر صادق ان کی اہلیہ ، انکے بیٹے سابق ایم این اے محمد زین الہی ان کے داماد چودھری وسیم گلزار ، ملک سہیل خان کمڑیال ، ملک شیر خان کھنڈا ، ملک اصغر ،ملک شیر خان سدریال شامل ہیں ۔ 

متحدہ مجلس عمل کے نوجوان امیدوار صوبائی اسمبلی حلقہ پی پی اٹک 1 نے کاغذات نامزدگی جمع کرانے کے بعد میڈیا کو بتایا کہ متحدہ مجلس عمل اور جماعت اسلامی نے مجھے ٹکٹ نوجوان لیڈر شپ اور مڈل کلاس کی نمائندگی کیلئے دیا ہے ،اس وقت ملک جاگیردارانہ ، سرمایہ دارانہ اور سیکنڈل زدہ سیاست کے اندرمتحدہ مجلس عمل کے نامزدامیدوار ہر طرح کی کرپشن سے پاک ہیں ،اسی سلسلہ کو آگے بڑھائیں گے شہریوں اور علاقہ کی بڑی تعدادکی حمایت کیساتھ میدان میں اترے ہیں اور مڈل کلاس کی عوام کے مسائل کو حل کرنے کیلئے میدان میں آئے ہیں عوام کی تائید اور نصرت سے فتح حاصل کریں گے خاص کر پاکستان کے اندر انرجی کرائسز کو ختم کرنے کیلئے کام کریں گے کالاباغ ڈیم کی تعمیر کیلئے متحدہ مجلس عمل کام کو آگے بڑھائے گی عوام کے کئی مسائل ہیں جن میں تعلیم ، صحت اور گراؤنڈز پر کام کریں گے اور لوگوں کے اندر جو احساس محرومی پایا جاتا ہے اس کو دو ر کریں گے کامیابی کے بعد تمام سرکاری زمینوں پر کھیل کے میدان آبادکریں گے سابقہ ادوار میں جو لوگ کامیاب ہوئے کامیابی حاصل کرنے کے بعد گھروں میں دبک کر بیٹھ گئے انہوں نے عوام کیلئے کچھ نہیں کیا ہم عوام کی حقیقی نمائندگی کا حق ادا کریں گے کاغذات نامزدگی جمع کرانے کیلئے ضلعی صدر ایم ایم اے علامہ رفاقت علی حقانی ، خادم حسین کربلائی ، جماعت اسلامی کے ضلعی امیرمولانا جابر علی خان ، محمد اقبال ملک ، امیر زون خالد محمود ، میاں محمدجنید ، علامہ نیاز اعوان ، صاحبزادہ حافظ نعیم آف دریا شریف اور دینی جماعتوں کے کارکنان کی بڑی تعداد موجو د تھی ۔ 

تحریک انصاف کے امیدوا ر حلقہ این اے 55 ملک امین اسلم نے کاغذات نامزدگی جمع کرانے کے بعد میڈیا سے بات چیت کرتے ہوئے کہا کہ میں نے تحریک انصاف کے ٹکٹ پر آج کاغذات جمع کرائے ہیں پاکستان ایک بھنور میں گھرا ہوا ہے ،20 سال کی جو مس گورنمنٹ ہے جس عوام کو پھنسایا ہوا ہے اس ملک پر قرضے چڑھے ہوئے ہیں بجلی کا بحران ایسا ہے کہ 20 سے 22 گھنٹے بجلی نہیں آتی پانی کا بحران بڑھتا جا رہا ہے جس سے ہمارے ملک کی سا لمیت کو خطرہ ہے میٹرومیں عوام کے اربوں روپے اس میں جھونک دئیے گئے ہیں کالا باغ ڈیم جو پاکستان کی ضرورت ہے اس پر کوئی توجہ نہیں دی گئی بھاشاڈیم کی زمین کے پیسے ابھی تک ادا نہیں کئے گئے انڈیا کو کھلی چھٹی دی گئی کہ وہ ہمارے پانیوں پر ڈیم بناتا گیا ہے 300 ڈیم انڈیا اب تک بنا کر پاکستان کے پانی پر آبی دہشت گردی کر رہا ہے ، پی ٹی آئی کو کامیاب کرائیں گے اور پی ٹی آئی پاکستان کی سالمیت پر کبھی آنچ نہیں آنے دے گی ملک میں وافر مقدارمیں درخت لگائیں گے تاکہ گرمی کا زور ٹوٹے اور ڈیم بھی بنانے ہیں تاکہ پانی کی قلت دور ہو یہ الیکشن پی ٹی آئی کا الیکشن ہے اورہم امید کرتے ہیں کہ 2 ماہ بعد عمران خان اس ملک کے وزیر اعظم ہونگے کالاباغ ڈیم بننا چاہئے میں 2002ء کی اسمبلی میں قرارداد لے کرآیا تھا اٹک ضلع کالا باغ ڈیم سے متاثر ہو گا مگر یہاں کے لوگ قربانی دینے کیلئے تیار ہیں بھاشادیم اور اکھوڑی ڈیم بننے سے بھی پانی کے حالات بہتر ہوسکتے ہیں تربیلا ڈیم کے پانی سے تین گنا پانی ہم سمندر میں پھینک دیتے ہیں ملین ٹری سونامی درخت عمران خان کا خواب تھا کامیاب ہو کر دس ارب درخت لگائیں گے ، تحریک انصاف میں ایک نظریئے کے تحت آئے تھے اور جب ٹکٹ کا مرحلہ آیا تو ہم نے یہ فیصلہ کیا کہ عمران خان جو فیصلہ کریں گے اس کے مطابق فیصلہ کریں گے جو لوگ پی ٹی آئی میں نظرئیے کو چھوڑ کر ٹکٹ کے حصول یا خاندانی اجارہ دارہ اور قبضہ جمانے کیلئے آئے تھے ان کو ٹکٹ کے حصول میں مایوسی ہوگی میجر طاہر صادق سے متعلق ایک سوال کا جواب دیتے ہوئے ملک امین اسلم نے کہا کہ اگر میجر طاہر صادق پی ٹی آئی میں رہے تو ہر امیدوا ر کو سپورٹ کریں گے منافقت کی سیاست کو فروغ نہیں دیں گے ملک امین اسلم کے ہمراہ ضلعی قیادت اور کارکنان کی بڑی تعداد موجو دتھی ۔ 

اٹک سٹی:چھوٹا اور بڑا گوشت مہنگے داموں فروخت کرنے والے قصاب کے خلاف مقدمات درج 

چھوٹا اور بڑا گوشت مہنگے داموں فروخت کرنے والے قصاب کے خلاف مقدمات درج ، تفصیلات کیمطابق ڈسٹرکٹ آفیسر آئی پی ڈبلیو ایم / با اختیار اسپیشل مجسٹریٹ درجہ اول ضلع اٹک ظہیر احمد خان نے عملہ کے ہمراہ دوران چیکنگ عبدالرشید ولد مسکین کو چھوٹا گوشت جس کا نرخ 600 روپے ہے 800 روپے کلو فروخت کرنے پر اور بڑا گوشت 400 روپے فروخت کرنے پر خادم حسین ولد محمد سلیم جس کا ریٹ 300 روپے ہے کے خلاف زیر دفعہ 3/7 پرائس کنٹرول ایکٹ کے تحت تھانہ اٹک سٹی میں 2 مقدمات درج کرا دیئے ہیں ۔ 

تحصیل حضرو:حاجی شاہ گوندل سٹاپ پر المناک ٹریفک حادثہ ‘علی الصبح نامعلوم گاڑی کی روڈ کے سائیڈ پر کھڑی سوزوکی کو ٹکر ‘ دو افراد جاں بحق

حاجی شاہ گوندل سٹاپ پر المناک ٹریفک حادثہ ‘صبح 5 بجے نامعلوم گاڑی کی روڈ کے سائیڈ پر کھڑی سوزوکی کو ٹکر جس کے نتیجہ میں 2 افراد موقع پر جاں بحق اور 2 شدید زخمی ہو گئے ۔اطلاع ملنے پر ریسکیو 1122 کی 2 گاڑیاں موقع پر پہنچ گئیں اور دونوں لاشوں کو ٹی ایچ کیو حضرو شفٹ کیا جبکہ زخمیوں کو ڈی ایچ کیو ہسپتال اٹک منتقل کیا گیا ، تفصیلات کے مطابق جاں بحق افراد میں نعیم عمر 50 سال ، شیر جان عمر 35 سال جبکہ نذیر احمد ولد فقیر احمد 26 سال ، ندیم ولد شہادت 19 سال شدید زخمی ہو گئے ڈرائیور سوزوکی کا ٹائرتبدیل کر رہے تھے کہ نامعلوم گاڑی نے ٹکر مار دی اور موقع سے فرار ہو گیا زخمی افراد کی حالت تشویشناک ہے جو کچھ بتانے سے قاصر ہیں ۔ 

ہانگ کانگ: جس طرح پاکستان کا بننا جتناضروری تھا ‘اتنا ہی ضروری کالا باغ ڈیم کا بننا ہے ؛منصف خان نمبرون 

علاقہ چھچھ کی ہانگ کانگ میں مقیم معروف کاروباری اور بزرگ شخصیت منصف خان آف گاؤں ابابکر نے میڈیا سے گفتگو کرتے ہوئے کہا کہ جس طرح پاکستان کا بننا جتناضروری تھا ‘اتنا ہی ضروری کالا باغ ڈیم کا بننا ہے ،انہوں نے کہا کہ گذشتہ دو مہینے انہوں نے پاکستان میں گزارے جہاں انہوں نے محسوس کیا کہ بجلی کی کمی کی وجہ سے لوڈشیڈنگ دن بدن بڑھتی جارہی ہے اور رمضان المبارک کے مقدس مہینے میں لوڈشیڈنگ کا دررانیہ اور بھی بڑھ گیا ہے۔ انہوں نے کہا کہ پاکستان کی خفیہ ایجنسیوں کے ذریعہ تحقیقات کرائی جائے کہ کون سے خفیہ ہاتھ ہیں جو کالاباغ ڈیم کو آگے بڑھانا نہیں چاہتے اور یہ مسلسل ڈیم کے راستہ میں رکاوٹ پیدا کر رہے ہیں ؟کیا وارسک ڈیم ، منگلا ڈیم اور کچھ دیگر ہاتھوں نے ڈیم بننے میں رکاوٹ پیدا کی تھی ،انہوں نے حکومت سے اپیل کی ہے کہ حکومتی سطح پر ایک کمیٹی بنائی جائے جو ڈیم کے سارے معاملات کی تحقیقات کرے ،چیف جسٹس آف پاکستان ڈیم کو ملکی مفاد کیلئے ضروری قرار دے کر ڈیم بنانے کا عدالتی سطح پر حکم جاری کریں ۔ 

اٹک سٹی:ڈسٹرکٹ جیل اٹک میں آنے والے اسیران کے لواحقین کے ساتھ ہمیشہ اچھا برتاؤ کیا جاتا ہے ؛رپورٹ

ڈسٹرکٹ جیل اٹک کے ترجمان نے اس بات کی وضاحت کی ہے کہ ڈسٹرکٹ جیل اٹک میں آنے والے اسیران کے لواحقین کے ساتھ ہمیشہ اچھا برتاؤ کیا جاتا ہے ،اس مقصدکے لیے تمام اہم ڈیو ٹی پوائنٹس پر فرض شناس اور ایماندار اہلکار تعینات کیے جاتے ہیں تاکہ ملاقاتی حضرات کے ساتھ بمطابق قواعد و ضوابط برتاؤ کیا جا ئے ۔سپرنٹنڈنٹ ڈسٹرکٹ جیل اورڈپٹی سپرنٹنڈ نٹ روزانہ کی بنیاد پر ملاقات شیڈ کا دورہ کرتے ہیں اور اسیران اور انکے لواحقین سے ملاقات سے متعلق مسائل دریافت کر کے فوری طور پر حل کرنے کی کو شش کرتے ہیں،جیل میں اسیران کے لواحقین کو تمام تر سہولیات فراہم کی جاتی ہیں ‘اسیران کے لواحقین کے لیے ملاقات شیڈ میں گرمی سے بچاؤ کے لے وافر مقدا رمیں پنکھے نصب کئے گئے ہیں ،ٹھنڈا پانی کے لیے واٹر چلر لگایا گیا ہے ،نیز خواتین و مرد لواحقین کے لیے علیحدہ علیحدہ بیٹھنے کا انتظام بھی موجود ہے ،اسیران جیل کوخوراک بمطابق سکیل اور ہفتہ وار شیڈول منظور کردہ گورنمنٹ آف پنجاب ہوم ڈیپارٹمنٹ لاہور فراہم کی جاتی ہے ، ڈسٹر کٹ اینڈ سیشن جج اٹک ہر ماہ دومرتبہ جیل کاتفصیلی دورہ کرتے ہیں اور ڈسٹرکٹ جج نے ہمیشہ جیل انتظامیہ کی جانب سے اسیران کو مہیا کی جانے والی کھانے پینے اور ملاقات شیڈ میں مہیا کی جانے والی سہولیات پر اطمینان کا اظہار کیا ہے اور جیل انتظامیہ کی اچھی کارکردگی کو سراہا ہے اور کبھی بھی اسیران یا انکے رشتہ داروں نے کوئی شکایت نہیں کی ہے۔

اٹک سٹی:عالمی ماحولیاتی دن کے حوالے سے ڈپٹی کمشنر آفس اٹک میں سیمینار کا اہتمام کیا گیا

عالمی ماحولیاتی دن کے حوالے سے ڈپٹی کمشنر آفس اٹک میں سیمینار کا اہتمام کیا گیا جس میں مختلف مکتبہء فکر سے تعلق رکھنے والے افراد نے شر کت کی تقریب کے مہمان خصوصی ڈپٹی کمشنر اٹک اکرام الحق تھے ،سیمینار سے خطاب کرتے ہوئے اسسٹنٹ ڈائریکٹر ماحولیات علی عمران نے عالمی ماحولیاتی دن کے اغراض ومقاصد پیش کیے ۔تقریب سے خطاب کرتے ہوئے ڈپٹی کمشنر اٹک اکرام الحق ودیگر مقررین نے کہا کہ ماحول کو صاف رکھنا وقت کی اہم ضرورت ہے،اس لیے ضروری ہے کہ ہم ماحول کو صاف رکھنے لے لیےء ہمہ وقت کوشش جاری رکھیں اور ایسی اشیاء کا استعمال ترک کر دیں جن کی وجہ سے معاشرے میں آلودگی پھیلے اور ان میں سب سے زیادہ نقصان دے چیز پلاسٹک ہے جس کی وجہ معاشرے میں آلودگی پھیل رہی ہے ہمیں چاہیے کہ ہم پلاسٹک سے بنی ہر شے کا استعمال ترک کر دیں تاکہ ماحول صاف رکھا جا سکے۔بعد ازاں ڈپٹی کمشنر آفس سے کچہری چوک تک واک کا اہتمام بھی کیا گیا ۔شرکاء نے عوامی آگاہی کے لیے بینرز اور پلے کارڈ اٹھا رکھے تھے۔

ضلع اٹک:لارنسپور کے رہائشی عبدالرشید کے گھر ایک انتہائی خطرناک سانپ گھس آیا، ریسکیو 1122کی بروقت کاروائی

ریسکیو 1122 کی خدمات جانوروں کیلئے بھی اسی طرح ہیں جس طرح انسانوں کے لییدارالسلام کالونی میں واقع یوفون کے ٹاور کے اوپر پھنسے چیل کو اتاراشدید گرمی میں چیل کو اتار کے ابتدائی طبی امداد دی اہل علاقہ نے ریسکیو کی خدمات کو بہت سراہا ۔ 

لارنسپور کے رہائشی عبدالرشیدکے گھر ایک انتہائی خطرناک سانپ گھس آیاجس کی وجہ سے گھر والوں میں خوف حراس پھیل گیااطلاع ملنے پر ریسکیو 1122 اٹک کی ٹیم فورأ موقع پر پہنچ گئی انتہائی ماہرانہ طریقے سے آدھے گھنٹے کے ریسکیو آپریشن کے بعد سانپ کو زندہ پکڑ لیا ریسکیو آپریشن کے بعد گھر والوں نے چین کی سانسیں لیں ریسکیو 1122 اٹک کا شکریہ ادا کیا۔

ضلع اٹک: اسلام آباد ائیرپورٹ پر چیکنگ کے دوران مسافر سے صرف ایک گولی برآمد ہونے پر مقدمہ درج 

اسلام آباد ائیرپورٹ پر چیکنگ کے دوران مسافر سے صرف ایک گولی برآمد ہونے پر مقدمہ درج ، تفصیلات کے مطابق کمپنی ڈیوٹی آفیسر نیو اسلام آباد ائیرپورٹ انسپکٹر عظمت حیدر نے تھانہ نیو ائیرپورٹ اٹک میں ایف آئی آر درج کرائی ہے کہ دوران چیکنگ زرشید ساکن ٹوپی (صوابی )کے بیگ سے ایک گولی 9mm برآمد ہوئی جس پر ملزم کے خلاف اسلحہ آرڈیننس کے تحت مقدمہ درج کر لیا گیا ۔ 

چھچھ انٹرچینج ایکسیڈنٹ:9 افراد کے زندہ جل کر جابحق ہو جانے کے نتیجہ میں ہائی ایس کے ڈرائیور کے خلاف مقدمہ درج 

9 افراد کے زندہ جل کر جاں بحق ہو جانے کے نتیجہ میں موٹروے پولیس کی درخواست پر ہائی ایس کے ڈرائیور کے خلاف مقدمہ درج ، تفصیلات کے مطابق سینئر پیٹرولنگ آفیسر شاہنواز باجوہ نے تھانہ حضرو میں ایف آئی درج کرائی ہے کہ وہ چارسو نارتھ موجود تھا کہ انہیں بذریعہ وائرلیس اطلاع ملی کہ چارسونارتھ پر ایک ہائی ایس کو آگ لگ گئی ہے ہم موقع پر پہنچے تو ہائی ایس نمبر RIS-1137 جو راولپنڈی سے چارسدہ جا رہی تھی سے ٹرک نہایت غفلت اور لاپرواہی سے آیا اور ہائی ایس کو پیچھے سے ٹکر ماری ڈرائیور کنٹرول نہ رکھ سکا جو گاڑی پہلی لائن سے ٹکرانے کے بعد سینٹرل ریزرویشن کیساتھ جا لگی اور لگتے ہی آگ لگ گئی جس سے پچھلی سیٹوں پر بیٹھے مسافروں کو موقع پر موجود لوگوں کی مدد سے باہر نکالا گیا جبکہ اگلی سیٹوں پر موجود 9 نامعلوم مسافر آگ کی لپیٹ میں آ کر مکمل جل گئے زخمیوں کو ٹی ایچ کیو ہسپتال حضرو پہنچایا گیا پولیس نے ہائی ایس ڈرائیور کے خلاف زیر دفعہ279,322,337-G ت پ کے تحت مقدمہ درج کر لیا ہے ۔ 

موضع چھچھ :موٹروے انٹر چینج کے قریب ٹریفک حادثہ ‘ٹرک نے مسافر وین کو پیچھے سے ٹکر مار دی ‘8 افراد جھلس کر جاں بحق ، 7 زخمی ہو گئے 

موٹروے چھچھ انٹر چینج کے قریب ٹریفک حادثہ ٹرک نے مسافر وین کو پیچھے سے ٹکر مار دی جس کے نتیجہ میں 8 افراد جھلس کر جاں بحق ، 7 زخمی ہو گئے ریسکیو 1122 عملہ کی فوری کاروائی کے سبب 6 افراد کو زندہ جل جانے سے بچا لیا گیا ، تفصیلات کے مطابق موٹروے چھچھ انٹر چینج کے قریب راولپنڈی سے پشاور جانے والے مسافر وین کو اس وقت حادثہ پیش آیا جب راولپنڈی سے پشاور جانے والے ٹرک نے مسافر وین کو پیچھے سے ہٹ کیا جس کے نتیجے میں ہائی ایس کے پیچھے لگے ہوئے سلنڈر میں آگ بھڑک اٹھی، آگ سے جھلس کر8مسافرموقع پر دم توڑ گئے جبکہ6افرادشدید زخمی ہوگئے، اطلاع پر ریسکیو ٹیمیں موقع پر پہنچ گئیں، حادثہ کے نتیجے میں دو بچوں،دوخواتین اور چارمردوں سمیت 8افراد موقع پر دم توڑ گئے جبکہ 6 شدید زخمی ہوئے جن میں بچے بھی شامل ہیں، ریسکیو1122 کے عملہ نے زخمیوں کوفوری طورپر ٹی ایچ کیو ہسپتال حضرو منتقل کر دیا ہے، زخمی ہونے والوں میں 10 سالہ سلیمان ولد ذوالفقار ، 16 سالہ محمد ولد اسلم ، 42 سالہ زردین ولد رحمن ولید ، 11 سالہ شاہ زیب ولد انور ، 5 سالہ شایان ولد ذوالفقار ، 40 سالہ محمد شیر ولی ولد لیاقت جن کا تعلق پشاور سے ہے اور مرنے والے تمام افراد کو شناخت کیلئے اسی ہسپتال میں منتقل کیا گیا ہے ، موٹروے پولیس ، ہائی وے پولیس ، ریسکیو 1122 اور دیگر قانون نافذ کرنے والے ادارے موقع پر پہنچ گئے ہیں ، جبکہ راولپنڈی پشاورشاہراہ کو عام ٹریفک کے لیے بند کر دیا گیا ہے، یہاں یہ بات قابل ذکر ہے کہ ریسکیو 1122 اٹک کی ایک گاڑی مریض کو لے کر اسلام آباد ہسپتال جارہی تھی جیسے ہی ایمبولینس چھچھ انٹر چینج کے قریب پہنچی تو اس حادثے میں گاڑی کے ڈرائیور قیصراورآی ایم ٹی آصف نے فوری کاروائی کرتے ہوئے 6افراد کو زندہ بچالیا ۔ 

اٹک سٹی:یتیموں کی دیکھ بھال کرنا نیکی اور باعث سعادت ہے ‘سعادت نصیب والوں کو حاصل ہوتی ہے ؛ اراکین جماعت اسلامی 

یتیموں کی دیکھ بھال کرنا بہت بڑی نیکی اور باعث سعادت ہے یہ سعادت نصیب والوں کو حاصل ہوتی ہے ،الخدمت فاؤنڈیشن کو یہ اعزاز حاصل ہے کہ وہ دس ہزار یتامیٰ کی کفالت کا فریضہ سر انجام دے رہی ہے ‘مخیر حضرات آگے اور اجرو ثواب سمیٹتے ہوئے دنیا اور آخرت دونوں میں فلاح و کامرانی پائیں ،ان خیالات کا اظہار آغوش الخدمت کیمپس اٹک میں 15ویں رمضان کو عالمی یوم یتامیٰ کے موقع پر ایک شام یتامیٰ کے نام منعقدہ پروگرام سے خطاب کے دوران مقررین نے کیا پروگرام کی صدارت چیئر مین یوسی شینکہ ، نائب صدر ایم ایم اے اور امیر جماعت اسلامی ضلع اٹک حافظ جابر علی خان نے ک اس موقع پر امیدوار جماعت اسلامی و ایم ایم اے پی پی ون اٹک محمد اقبال ملک ، صدر الخدمت فاؤنڈیشن سرجن ڈاکٹر نور حسین ملک سینئر ایڈمنسٹریٹر آغوش شبیر احمد کا کا خیل نے بھی خطاب کیا حافظ جابر علی خان نے کہاکہ یوم یتامیٰ اوآئی سی کی اپیل پر عالمی سطح اور ملک سطح پر منایا جارہا ہے اس بات کی سخت ضرورت ہے جب والد فوت ہو جاتا ہے تو ہنستا بستا خاندان مسائل کا شکار بن جاتا ہے با لخصوص بچوں کی دیکھ بھال اور ان کی تعلیم و تربیت میں فقدان آجاتا ہے اس موقع پر لواحقین اور معاشرے کے ذمہ داران کی یہ ذمہ داری آجاتی ہے کہ وہ یتامیٰ کی تعلیم و تربیت کا خاص خیال رکھیں دین اسلام نے اس کی بڑی تاکید کی ہے اور نبی کریم ؐ کے فرمودات میں بھی یہ چیز شامل ہے کہ یتیم کی کفالت کرنے والا قیامت کے دن میرے ساتھ ہوگا امید وار پی پی ون اٹک اقبال ملک نے کہا کہ یتیموں کی دیکھ بھال کرنا بڑے نصیبوں کا کام ہے انفرادی طور پر بھی اور اسے بڑھ کر اجتماعی طور پر یہ کرنے کا کام ہے بلکہ یہ کام حکومت کے کرنے کا ہے آغوش کے نا م پر ملک بھر میں برے پیمانے پر الخدمت فاؤنڈیشن احسن انداز سے سر انجام دے رہی ہے مزید اسے بہتر بنانے کی ضرورت ہے جب نظام مصطفیٰ آئے گا تو ان شا ء اللہ کسی کو شکایت نہیں ہوگی صدر الخدمت سرجن ڈاکٹرنور حسین ملک نے مخیر حضرات سے دل کھول کر فنڈدینے کی اپیل کی ہے ۔ 

اٹک سٹی:اپنے حلقہ انتخاب تحصیل اٹک وحضرو کے تمام دیہاتوں میں سوئی گیس کی فراہمی کروا دی ہے جو ایک ریکارڈ ہے؛ شیخ آفتاب احمد

نامزد امیدوار مسلم لیگ ( ن ) حلقہ این اے 55 سابق وفاقی وزیر شیخ آفتاب احمد نے کہا ہے کہ انہوں نے اپنے حلقہ انتخاب این اے 55 کی تحصیل اٹک اور حضرو کے تمام دیہاتوں میں سوئی گیس جیسی بنیادی ضرورت فراہم کر دی ہے جو ایک ریکارڈ ہے اسی طرح تحصیل حسن ابدال کے 25 سے زائد دیہاتوں کو سوئی گیس فراہم کی جا چکی ہے اور اللہ کے فضل و کرم ہونے کے بعد بقایا دیہاتوں میں بھی سوئی گیس فراہم کر دی جائے گی اسی طرح بجلی کے منصوبوں پر بھی کئی ارب روپے کی خطیر رقم لگا کر اپنے حلقہ انتخاب میں نہ صرف بجلی سے محروم حلقوں کو یہ بنیادی ضرورت بھی فراہم کی گئی بلکہ بجلی کے نظام کو بہتر بنانے کیلئے بھی کئی ارب روپے لگا کر بجلی کا نظام درست کیا گیا جو پنجاب بھر میں ریکارڈ رکھتا ہے ان خیالات کا اظہار انہوں نے اپنے حلقہ انتخاب کے مختلف دیہات میں عوام رابطہ مہم کے دوران کیا حلقہ پی پی 1 سے مسلم لیگ ( ن ) کے نامزد امیدوار شیخ سلمان سرور بھی موجود تھے شیخ آفتاب احمد نے کہا کہ مسلم لیگ ( ن ) کی حکومت نے شاندار جمہوری روایات قائم کیں ہیں وزیر اعظم شاہد خاقان عباسی کو جمہوری حکومت کی مدت اقتدار ختم ہونے پر وزیر اعظم ہاؤس سے گارڈ آف آنر کیساتھ رخصت کیا گیا جو پاکستان میں جمہوریت کی مضبوطی کا شاندار مظہر ہے انہوں نے کہا کہ اٹک سے تین میلہ ہٹیاں روڈ کو پہلے مرحلہ میں سنگل اور اب اسے دو رویہ بنانے کے سلسلہ میں منصوبہ پر کام جاری ہے جس پر ایک ارب روپے کی خطیر رقم خرچ ہو گی اس میں تین میلہ چوک کی تعمیر بھی شامل ہے کیونکہ پی اے سی کامرہ نے اٹک اور حضرو کے درمیان رابطہ کی واحد سڑک کو دفاعی لحاظ سے سکیورٹی رسک قرار دے کر بند کر دیا تھا اور اس سلسلہ میں تین میلہ ہٹیاں روڈ تعمیر کیا گیا ہے جس سے اٹک اور حضرو تحصیل کے درمیان سفر انتہائی آسان ہو گیا ہے یہ متبادل سڑک ہے جو لوگ اٹک سے جی ٹی روڈ یا موٹروے پر جانے کیلئے بھی استعمال کرتے ہیں اور یہی سڑک سی پیک جیسے بڑے منصوبہ میں استعمال ہو گی تین میلہ چوک کو جو انتہائی خوبصورت نظارہ پیش کر رہا ہے یہ چیئرمین بلدیہ اٹک ناصر محمود شیخ کی زیر نگرانی تعمیر ہوا ہے جس میں انہوں نے دن رات یہاں بیٹھ کر اپنی نگرانی میں کام کیا اس چوک میں یادگار شہدائے پولیس بھی تعمیر کی گئی ہے جو مسلم لیگ ( ن ) کی حکومت کی پولیس کے شہدأ سے وفاداری اور ان کے شہادت کے رتبہ کو خراج تحسین پیش کرنے کا ذریعہ ثابت ہو گی اس سڑک اور چوک کی تعمیر سے اٹک جو تعمیر و ترقی کی جانب تیزی سے گامزن ہے اس میں مزید نکھار اور خوبصورتی پیدا ہو گی انہوں نے کہا کہ الیکشن کمیشن کی جانب سے جاری کردہ الیکشن شیڈول کے مطابق وہ ان کے صاحبزادے شیخ سلمان سرور اور وزیر کھیل پنجاب جہانگیر خانزادہ ایک پینل کی صورت میں جمہوری روایات پر پیراعمل ہو کر مسلم لیگ ( ن ) کے ٹکٹ پر قومی اسمبلی کے حلقہ این اے 55 اور پنجاب اسمبلی سے پی پی 1 اور 2 سے انتخابی عمل میں حصہ لیں گے اور 25 جولائی کو پولنگ میں عوام مسلم لیگ ( ن ) کی 5 سالہ کارکردگی کو مد نظر رکھتے ہوئے انہیں نہ صرف اٹک بلکہ پورے پاکستان سے اللہ تعالیٰ اپنے فضل و کرم اور رسول کریم ؐ کے صدقے شاندار کامیابی سے ہمکنار کرائے گی مسلم لیگ ( ن ) کی کارکردگی پر اسے ووٹ ملے گا کیونکہ ہم نے عوام کو صرف جھوٹے وعدوں جیسے روٹی ، کپڑا اور مکان اور عمران خان کی طرح 100 دن کا جھوٹا پروگرام دے کر گمراہ نہیں کیا بلکہ عوام کو حقیقی معنوں میں زندگی کی بنیادی سہولیات فراہم کر کے انہیں نہ صرف یہ سہولیات فراہم کی ہیں بلکہ مسلم لیگ ( ن ) کی حکومت نے ملک بھر میں شعور بھی اجاگر کیا ہے نواز شریف کے نظریات اور عوام کیلئے کی جانے والی کاوشوں کی بنیاد پر ہم 2018 ء کے عام انتخابات میں شاندار کامیابی حاصل کریں گے انہوں نے کہا ہے مسلم لیگ ( ن ) کے متعلق تجزیہ کرنے والوں اور نجومیوں کے تمام خیالات اور گمراہ کن پراپیگنڈے غلط ثابت ہوں گے اور عوام شیر کے انتخابی نشان پر دل کھول کر مہریں لگائیں گے اور مسلم لیگ ( ن ) اور اس کا انتخابی نشان شیر مرکز اور صوبوں میں حکومتیں بنائے گا انہوں نے کہا کہ پاکستان مزید پھلے اور پھولے گا انہوں نے کہا کہ ان کی وزارت کے آخری روز ان کی وزارت کے عملہ اور افسران نے اور قومی اسمبلی میں اپوزیشن سے تعلق رکھنے والے ممبران نے جس طریقہ سے ذاتی حیثیت میں ان کی 5 سالہ کارکردگی کو سراہا ہے اس نے اس حلقہ کی عوام کے سر فخر سے بلند کر دیئے ہیں انہوں نے کہا کہ میں نے 5 سال جس طرح عزت اور وقار سے وزارت میں گزارے ہیں اور 5 سال بعد جب وہ وزارت چھوڑ کر اپنے حلقہ انتخاب میں آ رہے ہیں تو انہیں خوشی محسوس ہو رہی ہے کہ انہوں نے عوام سے کیے وعدے وفا کیے انہوں نے اپنے حلقہ انتخاب کے لوگوں کی مدد کی اور ملکی سطح پر بھی اسی طرح کام کیا بطور وفاقی وزیر اپنی وزارت قومی اور سینٹ میں انہوں نے اپنے فرائض ایمانداری سے ادا کیے وزارت کے جانے کے بعد وہ وہ سرخرو ہیں انہیں کہیں جا کر ندامت محسوس نہیں ہو رہی اور وہ عام انتخابات میں ہر جگہ اپنی کارکردگی اور عوام کی خدمت کی بنیاد پر ووٹ مانگیں گے ۔ 

اٹک سٹی:ضلعی تعلیمی جائزہ کمیٹی اٹک کاایک اجلاس ڈی سی آفس اٹک میں منعقد ہوا،ڈی سی اٹک اکرام الحق نے اجلاس کی صدارت کی 

ضلعی تعلیمی جائزہ کمیٹی اٹک کاایک اجلاس ڈی سی آفس اٹک میں منعقد ہوا،ڈی سی اٹک اکرام الحق نے اجلاس کی صدارت کی ،اجلاس میں سی ای او ایجوکیشن نثار احمد میو، ڈی ایم او فاروق عمرکے علاوہ محکمہ تعلیم کے افسران نے شرکت کی اجلاس میں محکمہ تعلیم اٹک کی کارکردگی کا تفصیلی جائزہ لیا گیا اس کے علاوہ ضلع بھر کے سکولوں کی کاکردگی، اساتذہ و طلباء کی حاضری اور دیگر پہلوؤں پر تفصیلی بحث کی گئی اجلاس میں سی ای او ایجوکیشن نثار احمد میو نے ڈی سی اٹک کو محکمہ تعلیم اٹک کی نصابی اور ہم نصابی سرگرمیوں کی متعلق تفصیلی بریفنگ دی بریفنگ دیتے ہوئے بتایا گیا کہ صوبائی حکومت نے ضلع اٹک کو تعلیمی کارکردگی کے لحاظ سے صوبہ پنجاب میں پہلے چار بہترین ضلعوں میں شمار کیا ہے ڈی سی اٹک اکرام الحق نے اس موقع پر محکمہ تعلیم اٹک کی کارکردگی کو سراہتے ہوئے کہا کہ صوبہ میں اعلیٰ پوزیشن حاصل کرنا نہایت خوش آئند ہے اور یہ سب محکمہ تعلیم اٹک کے افسران اور اساتذہ کی انتھک محنت کا ثمرہے ڈی سی اٹک نے امید کا اظہار کرتے ہوئے کہا کہ محکمہ تعلیم مستقبل میں بھی ایسی اعلیٰ کارکردگی کا مظاہرہ کرے گا ۔